Pandharpur Politic's : ‘चंद्रभागा कारखाना लढू नका; विधानसभेला पंढरपूरऐवजी माढ्याचा विचार करा’ : भालके-काळेंकडून अभिजित पाटलांना अटी

पंढरपूर : बाजार समिती निवडणुकीच्या निमित्ताने पंढरपुरात (Pandharpur) गुरुवारी (ता. २० एप्रिल) मोठ्या घडामोडी घडल्या. राष्ट्रवादीचे नेते कल्याणराव काळे (Kalyanrao Kale) -भगीरथ भालके (Bhagirath Bhalke) यांनी माघार घेत भाजपचे माजी आमदार प्रशांत परिचारकांना पाठिंबा दिला. बाजार समितीची निवडणूक विठ्ठल परिवार म्हणून एकत्रित लढवण्यासाठी बोलावलेली बैठक अटी आणि शर्तींनी गाजली. वसंतराव काळे कारखान्याची निवडणूक लढवू नका, अशी अट काळेंनी, तर भालकेंनी तुम्ही पंढरपूरऐवजी माढ्याचा विधानसभेसाठी विचार करा, असे सूचविले. मात्र, या सूचना मान्य नसल्याचे सांगून अभिजिती पाटील हे बैठक सोडून निघून गेल्याचे सूत्रांनी सांगितले. (Meeting of the Vitthal parivar was fruitless due to conditions)

विठ्ठल सहकारी साखर कारखान्याच्या निवडणुकीमध्ये दुभंगलेला विठ्ठल परिवार बाजार समितीच्या निवडणुकीच्या निमित्ताने पुन्हा एकत्र आणण्यासाठी प्रयत्न सुरु होते. पंढरपूर येथील शासकीय निवासस्थानामध्ये गुरुवारी दुपारी कल्याणराव काळे, भगीरथ भालके आणि अभिजीत पाटील हे तिघेही नेते एकत्रित आले होते. दरम्यान काही मुद्द्यावर एकमत न झाल्याने बैठक निष्फळ ठरली.

बाजार समितीची निवडणूक विठ्ठल परिवार म्हणून एकत्रित लढवण्यासाठी या नेत्यांमध्ये बैठक बोलावली होती. बैठकीमध्ये बाजार समितीच्या निवडणुकीबरोबर आगामी स्थानिक स्वराज्य संस्था, वसंतराव काळे साखर कारखाना आणि पंढरपूर विधानसभा या निवडणुकांवरही या नेत्यांमध्ये चर्चा झाली.

‘सहकार शिरोमणी वसंतराव काळे साखर कारखान्याच्या निवडणुकीत तुम्ही लक्ष घालू नका’, अशी अट राष्ट्रवादीचे नेते कल्याणराव काळे यांनी ठेवली. त्यानंतर भगीरथ भालके यांच्याकडूनही ‘पंढरपूर विधानसभा मतदासंघाऐवजी तुम्ही माढ्याचा विचार करा’ असे अभिजीत पाटील यांना सुचविण्यात आले. मात्र, दोन्ही नेत्यांच्या या सूचना आपणास मान्य नसल्याचे सांगून अभिजीत पाटील यांनी बैठक सोडल्याची कार्यकर्त्यामध्ये चर्चा सुरु आहे.

अभिजित पाटील निवडणूक लढण्यावर ठाम

दरम्यान, पंढरपूर कृषी उत्पन्न बाजार समितीच्या निवडणुकीमध्ये सत्ताधारी माजी आमदार प्रशांत परिचारक गटाच्या पाच जागा बिनविरोध निवडून आल्या आहेत. उर्वरीत १३ जागांसाठी ३२ उमेदवार निवडणुकीच्या रिंगणात उतरले आहेत. या निवडणुकीतून राष्ट्रवादीचे नेते कल्याणराव काळे व भगीरथ भालके यांच्या गटाने ऐनवेळी माघार घेतल्याने निवडणुकीतील हवाच निघून गेली आहे. मात्र, विठ्ठल सहकारी साखर कारखान्याचे अध्यक्ष अभिजीत पाटील गटाने परिचारक गटाच्या विरोधात १२ उमेदवार निवडणुकीच्या रिंगणात उतरवल्याने निवडणुकीत ट्विस्ट आला आहे.