परिचारक गटाचे तीन नगरसेवक राष्ट्रवादीच्या गळाला

पंढरपूर : विधानसभा पोटनिवडणुकीतील पराभवानंतर राष्ट्रवादी काँग्रेसचे भगिरथ भालके (bhagirath Bhalke) हे मतदारसंघातून गायब झाले होते. मात्र, सोलापूर जिल्हा दूध संघाच्या बैठकीला उपस्थिती लावल्यानंतर भालके चांगलेच सक्रीय झाले आहेत. त्यांनी भाजपचे माजी आमदार प्रशांत परिचारक (Prashant Paricharak) यांच्या तीन नरसेवकांना गळाला लावले असून ते आज राष्ट्रवादी काँग्रेसमध्ये प्रवेश करणार आहेत. (Three corporators of Paricharak group will join NCP)

विधानसभा पोटनिवडणुकीतील पराभव आणि विठ्ठल कारखान्यावर आलेल्या आर्थिक संकटानंतर राष्ट्रवादी काँग्रेसचे भगिरथ भालके हे पंढरपुरातून गायब होते. मात्र, सोलापूर जिल्हा दूध संघ, पंढरपूर आणि मंगळवेढा नगरपरिषद निवडणुकीच्या पार्श्वभूमीवर भालके हे पुन्हा राजकारणात सक्रीय झाले आहेत. त्यांनी सरकोलीत बैठकीत पंढरपूर नगरपरिषदेतील सत्ताधारी गटाचे नेते राष्ट्रवादीत प्रवेश करणार असल्याचे सूतोवाच कार्यकर्त्यांसमोर केले होते.

राजश्री गंगेकर, अक्षय गंगेकर, रंजना पवार या नरसेवकांसह शंकर पवार हे आपल्या समर्थकांसह परिचारक गटाची साथ सोडून हाती घड्याळ बांधणार आहेत. तोंडावर आलेल्या नगरपरिषद निवडणुकीच्या पार्श्वभूमीवर परिचारक गटाला हा धक्का मानला जात आहे. राष्ट्रवादीचे प्रदेशाध्यक्ष जयंत पाटील यांच्या उपस्थितीत पंढरपुरात हा पक्षप्रवेशाचा कार्यक्रम होणार आहे.

दरम्यान, प्रदेशाध्यक्ष तथा राज्याचे जलसंपदा मंत्री जयंत पाटील हे आज पंढरपूरच्या दौऱ्यावर आहेत. त्या पार्श्वभूमीवर राष्ट्रवादीतील सर्व गट मतभेट विसरून एकत्र आले आहेत. युवराज पाटील, गणेश पाटील आणि भगिरथ भालके यांची नुकतीच एकत्रित बैठक झाली होती. स्थानिक स्वराज्य संस्थांच्या निवडणुकीच्या तोंडावर राष्ट्रवादीतील एकोपा कार्यकर्त्यांना दिलासा देणारा ठरला आहे. पण, तो कायमस्वरूपी टिकण्याची गरज राष्ट्रवादीचे निष्ठावंत जुने जाणते कार्यकर्ते व्यक्त करीत आहेत.

दुसरीकडे, तीन नगरसेवकांनी साथ सोडल्यामुळे परिचारक यांना निवडणुकीपूर्वीच धक्का बसला आहे. यंदाच्या नगरपरिषद निवडणुकीत त्यांना विशेष परिश्रम घ्यावे लागण्याची चिन्हे दिसून येत आहेत.