Karad Nagar Parishad : कराडमध्ये तीन माजी नगराध्यक्षांना पुन्हा व्हायचंय नगरसेवक; आठ माजी नगराध्यक्ष प्रचारात सक्रिय

1. कराड नगरपालिकेच्या निवडणुकीत १३ माजी नगराध्यक्षांपैकी ३ जण प्रत्यक्ष उमेदवार म्हणून रिंगणात उतरले असून उर्वरित अनेकजण प्रचारात सक्रिय आहेत.

2. जाधव, पाटील, शिकलगार, साळुंखे, शिंदे, देसाई, सूर्यवंशी या माजी नगराध्यक्षांचे कुटुंबीय किंवा स्वत: सहभागी होत आघाड्यांच्या उमेदवारांना पाठिंबा देत आहेत.

3. फक्त माजी नगराध्यक्षा उमा हिंगमिरे या नोकरीमुळे प्रचारात नसून त्यांच्या पती उदय हिंगमिरे सक्रिय भूमिका बजावत आहेत.

Karad, 30 November : कराड नगरपालिका निवडणुकीची रणधुमाळी अखेरच्या टप्प्यात आहे. नगरपालिकेत १९९६ पासून आजअखेर १३ जणांना नगराध्यक्षपदावर काम करण्याची संधी मिळाली आहे. त्या माजी नगराध्यक्षांपैकी तिघेजण या वेळी नगरसेवकपदासाठी पुन्हा नशीब आजमावत आहेत. उर्वरित पैकी प्राध्यापक म्हणून कार्यरत असणाऱ्या उमा हिंगमिरे वगळता अन्य आठ माजी नगराध्यक्ष प्रचारात सक्रिय असल्याचे दिसून येत आहेत. त्यामुळे माजी नगराध्यक्षांनीही उमेदवारी, प्रचाराच्या निमित्ताने पुन्हा कंबर कसली आहे.

सुमारे ४२ वर्षांहून अधिक काळ कराड (Karad) नगराध्यक्षपदाची धुरा सांभाळून १९९६ मध्ये ज्येष्ठ नेते (कै.) पी. डी. पाटील यांनी पालिकेच्या राजकारणातून निवृत्ती घेतली. त्याच वेळी पालिकेत नगराध्यक्षपदासाठी आरक्षण लागू झाले. त्यावेळी पहिल्या महिला नगराध्यक्षा होण्याचा मान अर्चना पाटील यांना मिळाला. तेव्हापासून २०२४ अखेर १३ जणांना नगराध्यक्षपदी काम करण्याची संधी मिळाली.

माजी नगराध्यक्ष (कै.) जयवंतराव जाधव यांचा मृत्यू झाला आहे. उर्वरित १२ पैकी जयवंत पाटील हे प्रभाग एकमधून निवडणुकीला (Election) सामोरे जात आहेत. कुणबी दाखल्याच्या साहाय्याने त्यांनी प्रभाग एक (ब) मध्ये लोकशाही-यशवंत आघाडीची उमेदवारी घेत चुरस निर्माण केली आहे. माजी नगराध्यक्ष अल्ताफ शिकलगार यांचीही प्रभाग सहा (ब) मध्ये उमेदवारी आहे. त्यांचीही लाेकशाही-यशवंत आघाडीकडून उमेदवारी आहे.

पहिल्या महिला नगराध्यक्षा म्हणून ओळख असणाऱ्या अर्चना पाटील यांचीही प्रभाग पाच (अ) मध्ये काँग्रेसकडून उमेदवारी आहे. त्यामुळे जयवंत पाटील, अर्चना पाटील व अल्ताफ शिकलगार हे माजी नगराध्यक्ष या निवडणुकीत प्रत्यक्ष उमेदवार म्हणून रिंगणात असून, नगरसेवकपदासाठी नशीब आजमावत आहेत.

लोकनियुक्त पहिल्या महिला नगराध्यक्षा शारदा जाधव या सध्या निवडणूक रिंगणात नाहीत. मात्र, माजी नगराध्यक्ष (कै.) जयवंतराव जाधव यांचे कनिष्ठ सुपुत्र आशुताेष जाधव यांची जनशक्ती आघाडीतून प्रभाग क्रमांक नऊ (ब) मध्ये उमेदवारी आहे. जाधव कुटुंबातीलच उमेदवार असल्याने आशुताेष यांच्या प्रचारासाठी शारदा जाधव सक्रिय आहेत.

याच प्रभागात आशुताेष यांच्या विराेधात लाेकशाही-यशवंत आघाडीचे उमेदवार असणारे पोपटराव ऊर्फ प्रतापराव साळुंखे हे माजी नगराध्यक्षा ॲड. विद्याराणी साळुंखे यांचे बंधू आहेत. त्यामुळे ॲड. साळुंखे याही बंधू पाेपटराव साळुंखेंच्या प्रचारात अग्रभागी आहेत.

भाजपच्या माजी नगराध्यक्षा राेहिणी शिंदे याही भाजपच्या उमेदवारांच्या प्रचारासाठी प्रचारात सक्रिय आहेत. प्रभाग १४ मध्ये त्या प्रचार करत आहेत. सुषमा लाेखंडे या सध्या भाजपच्या शहराध्यक्षा म्हणून कार्यरत असल्याने त्याही भाजपच्या उमेदवारांच्या प्रचारासाठी सक्रिय आहेत. माजी नगराध्यक्षा संगीता देसाई या यशवंत विकास आघाडीच्या एकमेव माजी नगराध्यक्षा आहेत.

त्यामुळे संगीता देसाई या यशवंत विकास आघाडीच्या उमेदवारांसह नगराध्यक्षपदाचे उमेदवार राजेंद्रसिंह यादव यांच्या प्रचारासाठी सक्रिय सहभाग घेत आहेत. माजी नगराध्यक्षा बाळूताई सूर्यवंशी याही माजी नगराध्यक्षा अर्चना पाटील यांच्या प्रचारात नुकत्याच सक्रिय झाल्याचे सांगण्यात येत आहे.

पुरुषांमध्ये माजी नगराध्यक्ष जयवंत पाटील व अल्ताफ शिकलगार हे निवडणूक रिंगणात आहेत. उर्वरित दाेघांपैकी नुकतेच भाजप प्रवेश केलेले माजी नगराध्यक्ष अशाेक भाेसले हे प्रभाग नऊमध्ये आशुताेष जाधव यांच्या प्रचारात सक्रिय आहेत, तर माजी नगराध्यक्ष रामचंद्र काेळी हेही प्रभाग १३ मध्ये प्रचारात सक्रिय असल्याचे सांगण्यात येते.

उमा हिंगमिरेंना नोकरीमुळे अडचण

माजी नगराध्यक्षा उमा हिंगमिरे या यशवंतराव चव्हाण शास्त्र महाविद्यालयात प्राध्यापक म्हणून कार्यरत आहेत. नाेकरीमुळे त्या प्रचारात सक्रिय नसल्याचे दिसून येते. मात्र, त्यांचे पती उदय हिंगमिरे हे लाेकशाही-यशवंत विकास आघाडीच्या उमेदवारांच्या प्रचारासाठी प्रभाग १४ मध्ये सक्रिय असल्याचे पाहायला मिळते.

1. या निवडणुकीत किती माजी नगराध्यक्ष प्रत्यक्ष उमेदवार आहेत?

→ तीन – जयवंत पाटील, अर्चना पाटील आणि अल्ताफ शिकलगार.

2. कोणत्या माजी नगराध्यक्षा प्रचारात सक्रिय नाहीत?

→ उमा हिंगमिरे – नोकरीच्या कारणामुळे.

3. जाधव कुटुंबातील कोण उमेदवारीमध्ये आहे?

→ आशुतोष जाधव (प्रभाग ९ ब).

4. माजी नगराध्यक्ष कोणत्या आघाड्यांच्या प्रचारात मोठ्या प्रमाणात दिसतात?

→ लोकशाही–यशवंत आघाडी, यशवंत विकास आघाडी, भाजप आणि काँग्रेस.