Shahajibapu Vs Babasaheb : फडणवीसांच्या उपस्थितीत आमदार बाबासाहेब देशमुखांचा शहाजीबापूंवर पलटवार; ‘मला त्यावर बोलायला भाग पाडू नका’

1. सांगोला नगरपरिषद निवडणुकीत भाजप–शेकाप एकत्र येताच शिवसेनेचे माजी आमदार शहाजीबापू पाटील आणि शेकापचे आमदार डॉ. बाबासाहेब देशमुख यांच्यात शब्दयुद्ध पेटले आहे.

2. मुख्यमंत्री फडणवीस यांच्या सभेत आमदार देशमुख आणि पालकमंत्री गोरेंनी शहाजी पाटील यांच्यावर थेट टीका करत ‘मला बोलायला भाग पाडू नका’ असा इशारा दिला.

3. नगरविकास, एमआयडीसी, निधी आणि ‘टक्केवारी’च्या आरोपांवरून निवडणूक अधिक तापली असून भाजप–शेकाप विरुद्ध शहाजी पाटील असा संघर्ष तीव्र होत आहे.

Sangola, 30 November : सांगोला नगरपरिषद निवडणुकीत भाजप आणि शेतकरी कामगार पक्ष एकत्र आले आहेत, त्यामुळे शिवसेनेचे माजी आमदार शहाजीबापू पाटील यांनी सुरुवातीच्या टप्प्यात भाजपवर विशेषतः पालकमंत्री जयकुमार गोरे आणि शेकापचे आमदार डॉ. बाबासाहेब देशमुख यांच्यावर जोरदार हल्ले केले. आमदार देशमुख यांनी मुख्यमंत्री देवेंद्र फडणवीस यांच्या साक्षीने माजी आमदार शहाजीबापूंवर पलटवार केला आहे. ‘तुमच्यावर मला बोलायला भाग पाडू नका,’ असा इशारा डॉ. देशमुख यांनी शहाजी पाटील यांना दिला आहे.

भाजप उमेदवारांच्या प्रचारार्थ सांगोला येथे आज (ता. ३० नोव्हेंबर) मुख्यमंत्री देवेंद्र फडणवीस यांची सभा झाली. त्या सभेला आमदार गोपीचंद पडळकर, आमदार समाधान आवताडे, आमदार नारायण पाटील, आमदार सचिन पाटील, माजी खासदार रणजितसिंह निंबाळकर, माजी आमदार प्रशांत परिचारक, भाजप जिल्हाध्यक्ष चेतनसिंह केदार-सावंत, बाळासाहेब एरंडे आदींसह पदाधिकारी उपस्थित होते. त्या सभेत डॉ. बाबासाहेब देशमुख (MLA Babasaheb Deshmukh) यांनी शहाजीबापू पाटील यांच्या टीकेला उत्तर दिले.

सांगोला नगरपालिका निवडणुकीच्या अनुषंगाने बैठका आणि इतर चर्चा शहाजीबापू पाटील (Shahajibapu Patil ) खासगीतील विषय जाहीरपणे बोलतात. बापू मला वडिलांसमान आहेत. तेही मला मुलासारखे समजतात. परंतु तुम्ही कोणाला काय बोलता, उपमुख्यमंत्र्यांबद्दल खासगीत काय काय बोलता? हे मला चांगलेच माहित आहे. त्यावर मला बोलायला भाग पाडू नका, असा इशारा आमदार डॉ. बाबासाहेब देशमुख यांनी दिला.

आमदार देशमुख म्हणाले, सांगोल्यात पहिल्यांदाच शेकाप-दीपक साळुंखे गट आणि भाजप एकत्र आले आहेत. काहींच्या हट्टामुळे शहर विकासाची संधी हुकली आहे. सांगोल्यात एमआयडीसी मंजूर व्हावी, कब्रस्तानासाठी वाढीव जागा, डंपिंग ग्राउंड गावाबाहेर जावे यासाठी प्रयत्न करणे आवश्यक आहे.

शेतकरी कामगार पक्षाच्या कार्यकर्त्यांनी शहर विकास आघाडीचे उमेदवार विजयी करावेत, असे आवाहनही त्यांनी केले. सध्या विविध सभांमधून फोनवर एमआयडीसी मंजूर केल्या जात असल्याचे पाहिले जात आहे. सांगोला शहराच्या विकासासाठी परिसरात मोठी एमआयडीसी मंजूर करावी, अशी मागणीही आमदार डॉ. बाबासाहेब देशमुख यांनी मुख्यमंत्र्यांकडे केली.

सांगोल्यात टक्केवारीचा मुद्दा चर्चेत : गोरे

डॉ. बाबासाहेब देशमुख यांच्यासोबत पालकमंत्री जयकुमार गोरेंनीही शहाजी पाटलांवर टीकास्त्र सोडले. ते म्हणाले, शहाजीबापू आपल्यावर सतत अन्याय होत असल्याचे सांगतात. पण, एकत्र लढण्याच्या चर्चेनंतरही त्यांनी थेट नगराध्यक्षपदाचा उमेदवार जाहीर केला. शहर विकासासाठी मोठा निधी आला. मात्र, कामे झाली नाहीत. शहरात टक्केवारीचाच मुद्दा चर्चेत आहे. ही निवडणूक कोणाचे पुनर्वसन करण्यासाठी नसून विकासासाठी आहे.

आमच्याकडे खात्याचे हेडमास्तर : साळुंखे

शहाजीबापू स्वतःला राजे समजतात. दोन वेळा निवडून दिलं तरी टीका करतात. मी मुंबईला पाठवू शकतो, तसे घरी बसवूही शकतो. पण, सांगोल्यात जिकडे दीपक साळुंखे तिकडे गुलाल असतो. तालुक्याला कोण खरं-खोटं बोलतो, हे चांगलंच माहित आहे. नगरविकास खात्यावर त्यांचा जोर असला तरी आमच्याकडे सर्व खात्याचे ‘हेडमास्तर’ आहेत, हे त्यांनी विसरू नये. सांगोल्यात कमळ फुलवण्याची अपेक्षा आहे, अशा शब्दांत माजी आमदार दीपक साळुंखे यांनी शहाजी पाटील यांच्यावर तोफ डागली.

1) सांगोला निवडणुकीत कोणते पक्ष एकत्र आले आहेत?
→ भाजप आणि शेतकरी कामगार पक्ष (शेकाप) एकत्र आले आहेत.

2) डॉ. बाबासाहेब देशमुख यांनी कोणाला इशारा दिला?
→ शिवसेनेचे माजी आमदार शहाजीबापू पाटील यांना.

3) निवडणुकीत मुख्य वादाचा मुद्दा कोणता आहे?
→ विकासकामे, एमआयडीसी मंजुरी आणि ‘टक्केवारी’चे आरोप.

4) दीपक साळुंखे यांनी कोणावर टीका केली?
→ शहाजीबापू पाटील यांच्यावर तीव्र टीका केली.