Vijay Auti vs Nilesh Lanke : 'तुमचा पक्षच अस्तित्वात कुठे'; विजय औटींनी अजित पवार गटाच्या नेत्यांना डिवचलं !

Ahmadnagar News : राष्ट्रवादी काँग्रेस आणि शिवसेनेच्या फुटीनंतर नगर जिल्ह्यातील राजकीय समीकरणे बदलली आहेत. या परिस्थितीत सर्वच राजकीय पक्षांचे नेते आपलं राजकीय अस्तित्व शोधताना दिसत आहेत. अशातच विधानसभेचे उपाध्यक्ष राहिलेले माजी आमदार विजय औटी यांनी तुमचा पक्षच अस्तित्वात कुठे, असा सवाल करत राष्ट्रवादीच्या अजित पवार गटातील नेत्यांना डिवचलं आहे. त्यामुळे पुढील काळात आमदार नीलेश लंके आणि माजी आमदार विजय औटी यांच्यातील संघर्ष आणखी वाढताना दिसणार आहे. 

मविआ सरकार असताना विधानसभेचे उपाध्यक्ष राहिलेले माजी आमदार विजय औटी यांच्याकडे एक अभ्यासू लोकप्रतिनिधी म्हणून पाहिले जाते. त्यांनी 2019 पर्यंत सलग तीन टर्म पारनेर मतदारसंघाचे शिवसेनेकडून प्रतिनिधित्व केले आहे. 2019 मध्ये शिवसेनेतून राष्ट्रवादीमध्ये गेलेल्या नीलेश लंकेंनी त्यांचा पराभव केला. आता बदलत्या राजकीय परिस्थितीत नीलेश लंके अजित पवार यांच्यासोबत महायुतीत आहेत. त्यामुळे विजय औटी यांची राजकीय भूमिका काय असणार, याबाबत मतदारसंघात उत्सुकता आहे. 

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

याबाबत औटी, यांना विचारले असता ते म्हणाले, " आघाडी, महायुती स्थापन होताना अमुक-अमुक पक्ष एकत्र येत असतात आणि त्यांना नावे असतात. मात्र, सध्या राष्ट्रवादी काँग्रेस पक्ष कोणाचा याबाबत सध्या न्यायालयीन लढाई सुरू आहे. त्यामुळे तुमचा पक्षच अस्तित्वात आला का? असा प्रश्न औटी यांनी अजित पवार गटांच्या नेत्यांना केला आहे. तसेच कोण इकडून- तिकडे, तिकडून इकडे आले-गेले, याबाबत आपण अनभिज्ञ असल्याचे औटी म्हणाले. " 

"सध्याच्या सरकारमुळे गेल्या दोन वर्षांपासून जनतेत मोठी अस्वस्थता आहे. राज्याला दोन-दोन उपमुख्यमंत्री आहेत, त्यामुळे आता ग्रामपंचायतीत दोन उपसरपंच का नकोत असा प्रश्न लोकं उपस्थित करू लागले आहेत. सामाजिक-राजकीय अस्थिरतेमुळे नागरिकांतील अस्वस्थता वाढत असल्याचा दावा औटी यांनी केला आहे.

(Edited by Sudesh Mitkar)