Sangola Raid Case : सांगोल्यातील छाप्यात सापडलेले 28 लाख नेमके कशासाठी आणले?; सराफाला देता येईनात पुरावे...

1. सांगोला नगरपरिषद निवडणुकीपूर्वी पोलिसांनी भरारी पथकासह चार ठिकाणी छापे टाकून अनिल क्षीरसागर यांच्या घरातून 28.33 लाखांची रोकड जप्त केली.

2. क्षीरसागर यांनी ही रक्कम सराफ व्यवसायासाठी असल्याचा दावा केला, पण पुरावे न दिल्याने रोकड कोषागारात जमा करण्यात आली.

3. निवडणूक अधिकाऱ्यांनी प्राप्तीकर विभागाशी पत्रव्यवहार करून कागदपत्रांची पडताळणी झाल्यावरच रोकड परत देण्याची प्रक्रिया सुरू ठेवली आहे.

Solapur, 05 December : सांगोला नगरपरिषदेच्या निवडणुकीत स्थानिक गुन्हे शाखेच्या पोलिसांनी निवडणूक आयोगाच्या भरारी पथकाच्या मदतीने 30 नोव्हेंबर रोजी रात्री उशिरा माजी आमदार शहाजी पाटील यांच्या संपर्क कार्यालयासह चार ठिकाणी छापेमारी केली होती. त्यात शिवसेनेचे नगराध्यक्षपदाचे उमेदवार आनंदा माने यांचे निकटवर्तीय आणि सराफ व्यावसायिक अनिल सुभाष क्षीरसागर यांच्या घरात 28 लाख 33 हजार 500 रुपयांची रोकड आढळली. पोलिसांनी ती जप्त केली होती. त्यासंदर्भात कागदपत्रे क्षीरसागर यांनी अजूनही दिलेली नाहीत, त्यामुळे ती रक्कम कोषागार कार्यालयात (ट्रेझरी) जमा केल्याची माहिती निवडणूक निर्णय अधिकाऱ्यांनी दिली.

सांगोला नगर परिषदांसाठी २ डिसेंबर रोजी मतदान पार पडले असून त्याचा निकाल २१ डिसेंबर रोजी जाहीर होणार आहे. नगरपरिषदेच्या प्रचारासाठी उमेदवारांना एक डिसेंबरच्या रात्री दहापर्यंत परवानगी देण्यात आली होती. पण, स्थानिक गुन्हे शाखेला सांगोल्यात मतदारांना पैसे वाटप सुरु आहे, पैसे वाटपासाठी रोकड आणल्याची गोपनीय माहिती मिळाली होती.

गोपनीय माहितीच्या आधारे भरारी पथकाच्या मदतीने पोलिसांनी माजी आमदार शहाजी पाटील, सांगोला शहर विकास आघाडी, शिवसेनेचे माजी नगराध्यक्ष रफिक नदाफ आणि शिवसेनेचे नगराध्यक्ष पदाचे उमेदवार आनंदा माने यांचे निकटवर्तीय अनिल सुभाष क्षीरसागर यांच्या निवासस्थानी छापे टाकण्यात आले होते.

त्या छाप्यात अनिल क्षीरसागर यांच्या घरात २८ लाखांहून अधिक रोकड सापडली. व्हिडिओग्राफी करून ती रोकड जप्त करण्यात आली होती. पोलिस ठाण्यात आणून रक्कम मोजली. संबंधितांना ती रोकड त्यांचीच आहे, ती कोणत्या कामासाठी कोठून आणली होती, यासंबंधीच्या कागदपत्रांची मागणी करण्यात आली.

त्यावेळी आपला सराफ व्यवसाय असल्याने दागिने खरेदीसाठी ती रोकड घरात ठेवली होती, असे क्षीरसागर यांनी सांगितले. परंतु, त्याचे पुरावे मागण्यात आले. त्यांनी अजून कागदपत्रे दिले नसल्याचे अधिकाऱ्यांनी सांगितले.

निवडणूक अधिकाऱ्यांचा प्राप्तीकर विभागाशी पत्रव्यवहार

सांगोल्यातील अनिल क्षीरसागर यांच्या घरातील छाप्यात २८ लाख ३३ हजार ५०० रुपयांची रोकड सापडली आहे. त्यासंदर्भातील कागदपत्रे आपल्या विभागाकडे सादर झाल्यावर त्यासंबंधीची शहानिशा करून रोकड संबंधितास देण्याचे आदेश द्यावेत, असे पत्र निवडणूक निर्णय अधिकाऱ्यांनी प्राप्तीकर विभागाला पाठविले आहे. त्यामुळे क्षीरसागर यांना आता ती रोकड त्यांचीच आहे, कोणाकडून व कशा पद्धतीने ती रोकड त्यांच्याकडे आली, याची कागदपत्रे द्यावी लागतील, असेही अधिकाऱ्यांनी सांगितले.

1. पोलिसांनी छापेमारी का केली?
मतदारांना पैसे वाटप होत असल्याची गोपनीय माहिती मिळाल्यामुळे छापेमारी करण्यात आली.

2. किती रोकड जप्त करण्यात आली?
एकूण ₹28,33,500 रोकड जप्त करण्यात आली.

3. क्षीरसागर यांनी रोकडबाबत काय सांगितले?
ती सराफ व्यवसायासाठी ठेवली होती, असा दावा त्यांनी केला.

4. रोकड परत मिळण्यासाठी काय करावे लागेल?
रक्कम कशी आणि कोठून आली याची कागदपत्रे प्राप्तीकर विभागाला सादर करावी लागतील.