Satara News : शिवतीर्थाचे पावित्र्य जपणार; देसाईंसोबत जुंपून देण्याचे विकृत प्रवृत्तीकडून प्रयत्न : उदयनराजे

Udayanraje Bhosale News : लोकनेते बाळासाहेब देसाई यांचे राज्याच्या जडणघडणीत मोठे योगदान असून त्यांच्या स्मारकास आमचा बिलकुल विरोध नाही. पण, शिवतीर्थावरील स्मारकावरुन कोणताही वाद नसताना पालकमंत्री शंभूराज देसाई व माझ्यात जुंपून देण्याचे काम काही विकृत प्रवृत्ती करत आहे. पोवई नाक्यावरील शिवतीर्थाचे पावित्र जपले जाईल, त्यासाठी जे जे करावे लागेल ते केले जाईल, असे स्पष्ट मत खासदार उदयनराजे भोसले यांनी आज येथे पत्रकार परिषदेत व्यक्त केले.

शिवतीर्थावरुन सध्या सातारकर व पालकमंत्री देसाई Shambhuraj Desai असा संघर्ष होण्याची शक्यता आहे. या पार्श्वभूमीवर आज खासदार उदयनराजे भोसले Udayanraje Bhosale यांनी आपली भूमिका स्पष्ट केली. यावेळी त्यांनी आमदार शिवेंद्रसिंहराजेंवर ही निशाणा साधला. उदयनराजे म्हणाले, शिवतीर्थाबाबत कोणताही वाद नसताना माझ्यात व पालकमंत्री देसाई यांच्यात जंपून देण्याचे काम काहीजण करत आहेत.

स्वत:चे उदो उदो करुन घेणारा मी नाही. मुलांनी स्वत:हून माझे पेंटींग काढले. त्याला पालकमंत्र्यांशी जोडण्याचा प्रयत्न केला. पालकमंत्री शंभूराज देसाई व आमची फार जुनी व कॉलेजपासूनची मैत्री आहे. उगाच वाद लावून देण्याचे काम सुरु आहे. प्रत्येक ठिकाणी व्देषाचे अहंकाराचे राजकारण योग्य नाही. शिवतीर्थ हा एतिहासिक परिसर आहे. त्यावेळी एक समिती होती, त्यांनी शिवाजी महाराजांचा पुतळा उभारला. त्यावेळी बाळासाहेब देसाई मंत्री होते, त्यांच्या हस्ते शिवतीर्थावर छत्रपती शिवाजी महाराजांच्या या वेगळ्या व देखण्या पुतळ्याचे अनावरण झाले.

लोकनेते बाळासाहेब देसाई हे महाराष्ट्राचे महान नेते होते. राज्याच्या जडणघडणीत त्यांचे मोठे योगदान आहे त्यांच्या नावाचे स्मारक होण्यासाठी आमचा बिलकुल विरोध नाही. काही जणांकडून तसे भासवले जात आहे. मात्र प्रत्यक्षात तसे नाही पण ज्या ठिकाणी स्मारक उभे करण्याचा आग्रह केला जातोय. त्याच्या खाली ग्रेड सेपरेटर आहे. त्याची तांत्रिक माहिती घ्यावी लागेल. त्यांच्या स्मारकास आमचा हातभार असेल.

त्यावेळी जमिन भरीव होती, आता ग्रेडेपरेटर झाल्यामुळे तेथे तांत्रिक तपासणी करुनच निर्णय घेणे गरजेचे आहे. सातारकरांची मागणी भावनिक आहे. पण, तांत्रिक दृष्टया विचार करणे गरजेचे आहे. ही जागा पालिकेकडे असली तरी मालकी जिल्हा परिषदेची आहे. पण जिल्हा परिषद एक रुपयाही खर्च करत नाही. म्हणूनच ही जागा आम्ही पालिकेकडे द्या असे सांगत आहोत.

शिवतीर्थावरील या पवित्र कामासाठी प्रत्येकाने योगदान देणे गरजेचे आहे. एवढे वर्षे कोणीही लक्ष दिले नाही, आम्ही पुढाकार घेतला असून १६ कोटी रुपये या शिवतीर्थ स्मारकासाठी मंजूर करुन आणले आहेत. त्यामुळे याची चेष्ठा करुन अहंकाराची भाषेत बोलण्यापेक्षा त्यांनी विचार करावा. माझ्यात आणि शंभूराज देसाईंमध्ये जूंपून देण्याचे काम ही विकृत प्रवृत्ती करत आहेत.

माझे कोणाशीही वैरत्व नाही. सगळ्यांशी मैत्रत्वाचे संबंध आहेत. अहंकारातून व्यक्ती व्देष निर्माण करण्याचे काम ते करत आहेत, असा टोला त्यांनी शिवेंद्रसिंहराजेंचा नामोल्लेख टाळून लगावला. शिवतीर्थ परिसर ऐतिहासिक असून तो तसाच राहावा, अशी सर्व शिवप्रेमींसह माझी व शंभूराज देसाईंची भावना आहे. हा परिसर अधिक सुशोभित कसा करता येईल, थ्रीडी स्ट्रक्चरमध्ये स्मारक उभारण्याचा प्रयत्न आम्ही करणार आहोत.