Ajit Pawar Politics : ऐन मतदानाच्या दिवशी अजितदादांचा भाजपला धक्का; सोलापुरातील मोठ्या नेत्याचा राष्ट्रवादीत प्रवेश

Solapur, 15 January : राज्यातील 29 महापालिकांसाठी मतदान होत असतानाच उपमुख्यमंत्री अजित पवार यांनी भारतीय जनता पक्षाला मोठा धक्का दिला आहे. जिल्हा परिषद, पंचायत समितीच्या आगामी निवडणुकीच्या पार्श्वभूमीवर सोलापूर जिल्ह्याच्या मोहोळ तालुक्यातील मोठा नेता राष्ट्रवादीने गळाला लावला आहे. त्यामुळे झेडपी आणि पंचायत समिती निवडणुकीच्या पार्श्वभूमीवर भाजपला सोलापुरात धक्का बसल्याचे मानले जात आहे.

सोलापूर जिल्हा परिषदेचे माजी सभापती विजयराज डोंगरे, लोकशक्ती परिवाराचे प्रमुख मनोहर डोंगरे यांनी आपल्या समर्थकांसह आज बारामती येथे उपमुख्यमंत्री अजित पवार यांच्या प्रमुख उपस्थितीत राष्ट्रवादी काँग्रेसमध्ये प्रवेश केला आहे. आगामी झेडपी निवडणुकीच्या तोंडावर मोहोळमध्ये भारतीय जनता पक्षाला मोठा धक्का बसल्याचे मानले जात आहे.

लोकशक्ती परिवाराने भाजपला सोडचिट्ठी देत घड्याळ हाती बांधण्याचा निर्णय घेतल्यामुळे झेडपी निवडणुकीच्या तोंडावर भाजपची अडचण झाल्याचे मानले जात आहे. कारण डोंगरे परिवाराला मानणाऱ्यांची संख्या मोहोळ (Mohol) तालुक्यात आहे. तसेच, मनोहर डोंगरे हे पूर्वी राष्ट्रवादीचे जिल्हाध्यक्ष होते. त्यामुळे त्यांच्यासोबत काम करणारे अनेकजण आहेत.

विजयराज डोंगरे यांच्या राष्ट्रवादी प्रवेशाच्या माध्यमातून पक्ष सोडून गेलेले माजी आमदार राजन पाटील यांना शह देण्याचा प्रयत्न जिल्हाध्यक्ष उमेश पाटील यांनी केल्याचे मानले जात आहे. याशिवाय एकेकाळी मोहोळ तालुक्यात राम-लक्ष्मणाची जोड म्हणून ओळखल्या जाणारे राजन पाटील आणि मनोहर डोंगरे यांच्यात गेल्या काही वर्षांपासून वितुष्ट आलेले आहे, त्यामुळे पाटील आणि डोंगरे ह्या दोन तलवारी एकाच म्यानात राहू शकत नसल्याचे पुन्हा एकदा दिसून आले आहे.

दरम्यान, विजयराज डोंगरे यांचा मोहोळ तालुक्यातील शेटफळ येथे बुधवारी (ता. १४ जानेवारी) राष्ट्रवादी काँग्रेसमध्ये प्रवेश होणार होता. त्यासाठी उपमुख्यमंत्री अजित पवार हे शेटफळ दौऱ्यावर येणार होते.

मात्र, महापालिका निवडणुकीत पुण्यात घडलेल्या घडामोडींमुळे अजित पवार यांचा शेटफळ दौरा अचानक रद्द झाला होता. त्यामुळे मोहोळ तालुक्यात चर्चांना उधाण आले होते. मात्र, आज बारामतीत डोंगरे परिवाराचा राष्ट्रवादीत प्रवेश झाल्याचे त्यांच्या समर्थकांना हायसे वाटले असेल.