Phaltan doctor death update : फलटण प्रकरणात डॉ. धुमाळांकडूनच मोठा खुलासा; चौकशी समितीच्या अहवालानंतर ‘ते’ प्रकरण तिथंच संपलं होतं...

Phaltan investigation : फलटण उपजिल्हा रुग्णालयातील महिला डॉक्टरच्या आत्महत्येनंतर दररोज नवनवे खुलासे येत आहेत. महिला डॉक्टरने चौकशी समिती तसेच पोलिसांना लिहिलेल्या पत्रामध्ये अनेक धक्कादायक आरोप केले होते. त्यावरून उलटसुलट चर्चा सुरू झाल्या आहेत. आता आणखी एक नवा खुलासा समोर आला आहे. चौकशी समितीच्या अहवालानंतर संबंधित महिला डॉक्टरांना सूचना देण्यात आल्या होत्या, ते प्रकरण तिथंच संपलं होतं, असा दावा करण्यात आला आहे.

पीडित महिला डॉक्टर कार्यरत असलेल्या उपजिल्हा रुग्णालयाचे प्रभारी अधिक्षक डॉ. धुमाळ यांनीच एका वृत्तवाहिनीशी बोलताना हा दावा केला आहे. पीडितेने डॉ. धुमाळ यांच्या नावाचाही चौकशी समितीला लिहिलेल्या पत्रात उल्लेख केला आहे. पण डॉ. धुमाळ यांनी वृत्तवाहिनीशी बोलताना सर्व दावे फेटाळून लावले आहे. याबाबत आपल्याकडे त्यांनी कोणतीही तक्रार केली नसल्याचे त्यांनी म्हटले आहे.

आरोपी रुग्णांना रुग्णालयात तपासणीसाठी आणल्यानंतर संबंधित डॉक्टर महिला सहकार्य करत नव्हत्या, फिट किंवा अनफिटचे प्रमाणपत्र लवकर देत नव्हत्या, अशी तक्रार पोलिसांनी केली होती. त्या तक्रारीनंतर आरोग्य विभागाने चौकशी समिती नेमली होती. या समितीकडे पीडितेने लेखी खुलासा दिला होता. त्यामध्ये पीडितेने पोलिसांवर अनेक गंभीर आरोप केले होते. आपल्यावर चुकीचे प्रमाणपत्र देण्यासाठी दबाव टाकला जात असल्याचा आरोप तिने केला होता.

याबाबत बोलताना डॉ. धुमाळ म्हणाले, ‘चौकशी समितीच्या अहवालानंतर आम्ही महिला डॉक्टरांना सूचना दिल्या दिल्या. त्यानंतर ते प्रकरण तिथंच संपलं होतं.’ चौकशी अहवालामध्ये नेमके काय होते, त्यांना काय सूचना दिल्या, याबाबत मात्र त्यांनी माहिती दिली नाही. पोलीस निरीक्षक आरोपी रुग्णालयात येऊन धमकी देत असल्याचा पीडितेने केलेल्या आरोपांवर बोलताना धुमाळ यांनी आपल्याला याबाबत माहिती नसल्याचे सांगितले.

पीडितेने चौकशी समितीला दिलेल्या पत्रातील आरोपांबाबत नकारार्थी उत्तरे दिली. त्यांनी याबाबत आपल्याकडे काहीही लेखी तक्रार नसल्याचे किंवा आपल्याला त्यांनी सांगितले नसल्याचे स्पष्ट केले. दरम्यान, याप्रकरणी पोलिसांनी दोन आरोपींना अटक केली आहे. त्यामुळे या प्रकरणाबाबत आणखी खुलासे समोर येऊ शकतात.