Santosh Deshmukh Murder : संतोष देशमुखांच्या हत्येविरोधातील एल्गारात शरद पवारांनंतर हा नेता होणार सहभागी

Pune News :  मस्साजोग गावातील माजी सरपंच संतोष देशमुख यांच्या हत्येच्या निषेधार्थ  शनिवारी २८ डिसेंबरला बीड येथे मोर्चा काढण्यात येणार आहे. हा सर्वपक्षीय मोर्चा असणार असून या मोर्चाला राष्ट्रवादी शरदचंद्र पवार पक्षाचे प्रमुख शरद पवार हे देखील हजेरी लावण्याची शक्यता आहे. शरद पवार सोबत जितेंद्र आव्हाड देखील या मोर्चात सहभागी होतील असं सांगण्यात येत आहे. 

यासोबतच आता छत्रपती संभाजीराजे यांनी आपण संतोष देशमुख यांना न्याय मिळवुन देण्याच्या मागणीसाठी बीडमध्ये निघणाऱ्या  मोर्चात  सहभागी होणार असल्याचे सांगितले आहे. याबाबत छत्रपती संभाजीराजे यांनी सोशल मीडियावर पोस्ट केली असून वाल्मिक कराड सह धनंजय मुंडेंचे यांच्यावर टीका केली आहे. 

या पोस्ट मध्ये छत्रपती संभाजीराजे म्हणाले, संतोष देशमुख यांना न्याय मिळवुन देण्याच्या मागणीसाठी बीड मध्ये निघणाऱ्या मोर्चात मी सहभागी होणार आहे, या मोर्चात तुम्ही देखील सहभागी व्हावे.

दि. २८ डिसेंबर रोजी बीडमध्ये आयोजित मोर्चामध्ये मी सहभागी होत आहे. संतोष देशमुख यांना न्याय मिळावा, आरोपी वाल्मिक कराड व इतर दोषींना तात्काळ अटक करावी, ही माझी ठाम मागणी आहे. मी पहिल्याच दिवशी भूमिका घेतली होती की, धनंजय मुंडे यांचे आरोपींशी जवळचे संबंध असल्यामुळे प्रशासनावर दबाव येऊ शकतो. नंतर मुंडे यांनी स्वतःच आरोपी वाल्मिक कराडसोबतचे संबंध मान्य केले आणि त्यांची बाजू उघडपणे घेतल्याने हा दबाव स्पष्ट झाला.

राज्यातील कायदा आणि सुव्यवस्था टिकवण्याचे कर्तव्य सरकारचे आहे, परंतु जनता रस्त्यावर उतरल्याशिवाय सरकारला जाग येत नाही, हे दुर्दैवी आहे. संतोष देशमुख यांना न्याय मिळवून देण्यासाठी मी देशमुख कुटुंबीयांसोबत ठामपणे उभा आहे.