Rahul Narwekar Action: पडळकर-आव्हाडांचे समर्थकांमध्ये राडा, विधानसभा अध्यक्ष राहुल नार्वेकरांची पहिली प्रतिक्रिया, म्हणाले 'फौजदारी...'

Rahul Narwekar News: आमदार गोपीचंद पडळकर यांचा कार्यकर्ता हृषिकेश टकले आणि आमदार जितेंद्र आव्हाड यांचा कार्यकर्ता नितीन देशमुख यांच्यात विधानभवनाच्या लाॅबीमध्ये जोरदार हाणमारी झाली. त्यामुळे एकच गोंधळ उडाला होता. विधान भवनाच्या परिसरात हा प्रकार घडल्याने काय कारवाई होणार याची उत्सुकता होती. मुख्यमंत्री देवेंद्र फडणवीस यांनी या प्रकरणी कठोर कारवाईची मागणी विधानसभाअध्यक्ष राहुल नार्वेकर यांच्याकडे केली होती.

या प्रकरणानंतर राहुल नार्वेकर यांनी आपली पहिली प्रतिक्रिया माध्यमांना दिली आहे. ते म्हणाले, 'या प्रकरणी चौकशी अहवाल मागवला आहे. योग्य ती कारवाई केली जाणार. फौजदारी कारवाई देखील केली जाणार. विधीमंडळात माझ्याकडे जे अधिकार आहेत त्या स्तरावर योग्य कारवाई होईल.'

'अंत्यत दुर्भाग्यपूर्णअशीही घटना आहे. संसदीय लोकशाहीच्या या मंदिरात अशी घटना घडणं हे लोकशाहीसाठी योग्य नाही.', असे देखील नार्वेकर म्हणाले.

दरम्यान, हा घटनेनंतर उद्धव ठाकरे यांनी ज्यांमध्ये हाणामरी झाली त्यांना विधीमंडळात येण्यासाठी पास कोणी दिले त्यांच्यावर कारवाई करण्याची मागणी केली. कोणी असेल त्याला सोडू नये तसेच मुख्यमंत्र्यांनी या प्रकरणावरून कारवाई करत आपली पात्रता दाखवावी, असे आवाहन देखील ठाकरे यांनी केले.

विधानभवनात गँग वॉर

संजय राऊत यांनी ट्विट करत महाराष्ट्राच्या विधानभवनात आज गँग वॉर झाले.भारतीय जनता पक्षाने विधीमंडळात आणि त्यांच्या पक्षात गुंड टोळ्या आणल्या आहेत. देवेंद्र फडणवीस यांच्या काळात महाराष्ट्र राज्याची संस्कृती उध्वस्त झाली आहे. फडणवीस हे गृहमंत्री आहेत, त्यांच्या नाकासमोर विधानभवनात दंगल झाली! असे टीका केली आहे.