मारहाण करणारा ऋषिकेश टकले 'मकोका' आरोपी? आव्हाडांचा दावा, पोलिसांचा खुलासा वेगळाच!

थोडक्यात बातमी :

1. पावसाळी अधिवेशनादरम्यान राष्ट्रवादी काँग्रेसचे जितेंद्र आव्हाड आणि भाजपचे गोपिचंद पडळकर यांच्या समर्थकांमध्ये हाणामारी झाली.

2. आव्हाड यांनी आरोप केला की ऋषिकेश टकले मकोका कायद्यांतर्गत आरोपी आहे.

3. सांगली पोलिसांनी मात्र मकोका अंतर्गत कोणताही पुरावा नसल्याचे स्पष्ट केले आहे.

Mumbai/Sangli News : सध्या पावसाळी अधिवेशन सुरू असून बुधवारी (ता.16) राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड आणि भाजपचे आमदार गोपिचंद पडळकर यांच्यात बाचाबाची झाली होती. पडळकर यांनी आव्हाडांना अपशब्द वापरले होते. यामुळे राजकीय वातावरण तापले असतानाच आज (ता. 17) विधानभवनाच्या लॉबीमध्ये आव्हाड आणि पडळकर यांचे कार्यकर्ते समोरा-समोर आले. त्यानंतर लॉबीमध्येच दोन्ही बाजूच्या कार्यकर्त्यामध्ये जोरदार हाणामारी झाली. या धक्कादायक प्रकाराचे पडसाद विधिमंडळात उमटलेच शिवाय राज्यभरात याची जोरदार चर्चा सुरू आहे. दरम्यान या प्रकरणात आता नवी माहिती समोर आली असून आव्हाड यांनी विधिमंडळातील घटनेवर प्रतिक्रिया देताना ते सगळे आपल्याला मारण्यासाठी आले होते असा दावा केला आहे. तसेच राडा करणारा ऋषिकेश टकले हा मकोकातील गुन्हेगार असल्याचा आरोप केला होता. ज्यानंतर आता नवी माहिती समोर आली आहे.

विधानभवनात राडा करणारा ऋषिकेश टकले हा सांगली जिल्ह्यातील पलूसमधील पाचवा मैलचा रहिवाशी आहे. त्याची हिंदुस्तान शिव मल्हार संघटना असून तो सांगली जिल्हा अध्यक्ष आहे. तर तो पडळकर यांचा समर्थक आहे. आताही तो पडळकर यांच्याबरोबरच मुंबईत अधिवेशनासाठी होता. दरम्यान आज त्याने आव्हाड यांच्या कार्यकत्त्यांबरोबर राडा घातला. याचे आता राजकीय वर्तूळात पडसाद उमटले असून विरोधकांनी यावरून जोरदार टीका केलीय.

दरम्यान आव्हाड यांनी ऋषिकेश टकले हा 'मोका' (MCOCA) कायद्यांतर्गत आरोपी असल्याचा दावा केला आहे. तसेच त्यांनी, अशा पद्धतीचा गंभीर गुन्हा दाखल असणाऱ्या गुंडाला विधानभवनात प्रवेश दिलाच कसा जातो, असा सवाल उपस्थित केला आहे. तर अशांमुळे विधानभवनात आमदारांनाच सुरक्षित वाटत नसल्याचा संदेश या घटनेमुळे राज्यात गेल्याचे त्यांनी म्हटलं आहे.

पण सांगली पोलिसांनी याबाबत वेगळीच माहिती दिली असून त्यांच्या माहितीनुसार ऋषिकेश टकले हा 'मोका' (MCOCA) कायद्यांतर्गत आरोपी नाही. तर त्यांच्यावर पलूस पोलीस ठाण्यात मारामारी व इतर गुन्हे दाखल आहेत. तर भिलवडी पोलीस ठाण्यात विनयभंग, मारामारी, सरकारी कामात अडथळा, गंभीर दुखापत करणे, हाफ मर्डर असे गुन्हे दाखल आहेत. आतातर त्याच्यावर विधानभवनात राडेबाजी आणि हाणामारी करण्याचा गुन्हा दाखल होण्याची शक्यता आहे. यामुळे ऋषिकेश टकले याला हे प्रकरण आता महागात जाण्याची शक्यता आहे

दरम्यान या घटनेनंतर गोपिचंद पडळकर यांनी या प्रकरणी दिलगीरी व्यक्त करताना ऋषिकेश टकले हा आपला कार्यकर्ता असल्याचं कबूल केलं आहे. आता या घटनेचे सीसीटीव्ही फुटेज चेक केले जात असून चौकशीसाठी जणांना पोलिसांनी ताब्यात घेण्यात आले आहे.

प्र: आव्हाड-पडळकर यांच्यात वाद का झाला?
उ: दोन्ही नेत्यांच्या समर्थकांमध्ये विधानसभेच्या बाहेर वाद झाला आणि त्यातून हाणामारी घडली.

प्र: ऋषिकेश टकले मकोका अंतर्गत आरोपी आहे का?
उ: पोलिसांच्या माहितीनुसार, त्याच्याविरुद्ध मकोका अंतर्गत कोणताही अधिकृत पुरावा सध्या नाही.

प्र: पुढील कारवाई काय होणार आहे?
उ: पोलिस तपास सुरू असून दोन्ही पक्षांच्या कार्यकर्त्यांवर कारवाईची शक्यता आहे.