Raj Thackeray News : गंगेचं पाणी... हड, मी नाही पिणार! कुंभमेळ्यातील पवित्र स्नानावरून राज ठाकरेंचा सर्वात मोठा प्रहार

Pune News : प्रयागराज येथे महाकुंभ मेळ्यामध्ये कोट्यवधी लोकांनी गंगा नदीत पवित्र स्नान केले. अनेक राजकीय नेत्यांसह सेलिब्रेटी आणि परदेशी नागरिकांनी देखील कुंभमेळा मध्ये स्नान केलं. या कुंभची चर्चा जगभरात झाली. त्यावर आता मनसे अध्यक्ष राज ठाकरे यांनी केलेल्या विधानामुळे वाद निर्माण होण्याची शक्यता आहे.

महाराष्ट्र नवनिर्माण सेनेच्या 19 व्या वर्धापन दिनानिमित्त पिंपरी चिंचवड येथे आयोजित मेळाव्यात राज ठाकरेंनी कुंभमेळ्यावर भाष्य केले. ते म्हणाले, काही दिवसांपूर्वी मुंबईमध्ये पक्षाची बैठक लावली होती. त्या बैठकीला काही शाखा अध्यक्ष, विभाग अध्यक्ष उपस्थित नव्हते. जे हजर नव्हते त्यांची हजेरी मी घेतली. त्यातील काही जणांनी गैरहजर राहण्याची विविध कारण सांगितली. तर पाच ते सहा जणांनी ते कुंभला गेले होते असं सांगितलं.

कुंभला जाण्याइतकी पापं करता कशाला, असा सवाल केल्याचं राज ठाकरे यांनी सांगितलं. राज ठाकरे पुढे म्हणाले, बाळा नांदगावकर देखील एका छोट्याश्या कमंडलूमधून पाणी घेऊन आले मी म्हटलं हड... मी पाणी पिणार नाही. सोशल मीडियावर अनेक व्हिडिओ पाहिलेत. कोण पिणार ते पाणी? आताच कोरोना गेलाय. त्याचं कुणाला देणं घेणं नाही दोन वर्षे तोंडाला फडकी लावून फिरला आहात आणि तिकडे जाऊन आंघोळ करत आहेत.

एक नदी या देशात स्वच्छ नाही. आणि आम्ही नदीला माता म्हणतो. परदेशामध्ये जातो तेव्हा त्या ठिकाणी पाहतो एकदम स्वच्छ नद्या असतात. ते तिकडे नदीला माता वगैरे काही म्हणत नाही तरी त्यांच्या नद्या स्वच्छ असतात आणि आपल्याकडे दूषित पाणी नद्यांमध्ये सोडलं जातं, असेही राज ठाकरे यांनी म्हटलं आहे.

माजी पंतप्रधान राजीव गांधी यांच्यापासून मी ऐकत आहे, गंगा साफ होणार. त्यानंतर राज कपूर यांनी चित्रपट आणला, लोकांना गंगा साफ झाली असं वाटलं मात्र चित्रपटाप्रमाणे गंगा साफ असेल तर आम्ही ही स्नान करायला तयार आहोत, असं लोक म्हणाली. मात्र अद्यापही गंगा काही साफ झालेली नाही. त्यामुळे श्रद्धा अंधश्रद्धा मधून लोकांनी बाहेर यायला हवं, असं राज ठाकरे म्हणाले.

(२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप)