MNS chief Raj Thackeray : 'डोळा मारला की, फुटपाथ बदलणारे राजकीय फेरीवाले पक्षात नकोत'; राज ठाकरेंची पक्षांतरावर बोचरी टीका

Pune News : आगामी स्थानिक स्वराज्य संस्थांच्या निवडणुकीच्या पार्श्वभूमीवर सध्या मोठ्या प्रमाणात पक्षांतर पाहायला मिळत आहे. महायुतीतील मित्र पक्षांमध्ये मोठ्या प्रमाणात सध्या इनकमिंग सुरू आहे.

शिंदेंच्या सेनेकडून देखील 'ऑपरेशन टायगर'च्या माध्यमातून अनेक नेत्यांना पक्ष प्रवेश दिला जात आहे. या सर्व घडामोडींवर मनसे अध्यक्ष राज ठाकरे यांनी सडकून टीका केली आहे.

मनसे (MNS) अध्यक्ष राज ठाकरे यांनी आज पक्षाच्या एकोणिसाव्या वर्धापन दिन कार्यक्रमानिमित्त पिंपरी चिंचवडमध्ये आयोजित कार्यक्रमात कार्यकर्त्यांना संबोधित केलं. राज ठाकरे म्हणाले, "आज पक्षाला 19 वर्ष पूर्ण झाली आहेत. यानिमित्त असंख्य पक्षांना प्रश्न पडला आहे की? यांचे आमदार येऊन गेले, यांना खासदारकीला इतकं मत मिळाली, त्यानंतर इतके पराभव झाले, खासदारकीला आमदारकीला पराभव झाले तरी, या पक्षातील लोक एकत्रित कशी राहतात?"

राज ठाकरे (Raj Thackeray ) पुढे म्हणाले, "आपण पाहतो फेरीवाले हे कष्टाने काम करतात. मात्र आता जे राजकीय फेरीवाले आले आहेत. ते आपल्या पक्षांमध्ये नाहीत. आज या फुटपाथवर, तर तिकडनं कोणी डोळा मारला की त्या फुटपाथवर जातात. असले राजकीय फेरीवाले आपल्याला निर्माण करायचे नाहीत". आपल्याला जे बांधायचे ते आपण खणखणीत दुकान बांधू मात्र आपल्या पक्षात राजकीय फेरीवाले होणार नाहीत, असं राज ठाकरे म्हणाले.

सध्या आपली पक्ष संघटना आणखी मजबूत करणे गरजेचे आहे. त्यासाठी आता पक्ष संघटनेतील प्रत्येकाला विशिष्ट असं काम नेमून देण्यात येणार आहे. आणि ते काम प्रत्येक पंधरा दिवसानंतर तपासण्यात येणार आहे. यासाठी वरपासून खालपर्यंत यंत्रणा लावली आहे. आणि जर महिना-दीड महिन्यात कुठला पदाधिकारी कामा मध्ये टाळाटाळ करत असल्याचं जाणवल्यास त्याला पदावरती ठेवलं जाणार नाही. मग त्याने कोणत्या फुटपात वर जायचंय तिकडे जावं असं राज ठाकरे म्हणाले.

12 तारखेला आता प्रत्येक पदाधिकाऱ्याला त्याची जबाबदारी देण्यात येईल. यासाठी काही टीम तयार करण्यात आले असून त्या तुमच्या पर्यंत पोहोचतील. जी संघटनात्मक रचना तयार करण्यात आली आहे. त्याचे रिजल्ट आगामी स्थानिक स्वराज्य संस्थांच्या निवडणुका दिसतील असा विश्वास देखील राज ठाकरे यांनी व्यक्त केला.