NCP Rajya Sabha Candidate : राज्यसभेसाठी तगडी फिल्डिंग, उद्धव ठाकरेंचा माजी खासदार राष्ट्रवादीच्या संपर्कात, सुनेत्रा पवार मोठा निर्णय घेणार

NCP News : राज्यसभेसाठी उमेदवारी अर्ज दाखल करण्यास अवघ्या दोन दिवसांत सुरुवात होणार आहे. मात्र, राष्ट्रवादी काँग्रेसकडून उमेदवाराचे नाव अंतिम झालेले नाही. आज राष्ट्रवादीचे नेते प्रफुल पटेल यांच्या मुंबईतील निवास्थानी राष्ट्रवादीच्या नेत्यांची बैठक पार पडत आहे. या बैठकीत अंतिम नाव निश्चित होण्याची शक्यता वर्तवली जात आहे.

माजी खासदार नवनीत राणा यांनी मुख्यमंत्री देवेंद्र फडणवीस आणि उपमुख्यमंत्री सुनेत्रा पवार यांची भेट घेतल्याने त्या उमेदवारीसाठी राष्ट्रवादीकडून इच्छुक असल्याची चर्चा होती. मात्र, राष्ट्रवादीच्या बाहेरच्या उमेदवाराला उमेदवारी देण्यात येणार नसल्याचे प्रदेशध्यक्ष सुनील तटकरे यांनी स्पष्ट केले होते. आता उद्धव ठाकरेंच्या शिवसेनेतील माजी खासदार उमेदवारीसाठी राष्ट्रवादीच्या संपर्कात असल्याचे वृत्त एका मराठी वृत्तवाहिनीने दिले आहे.

शिवसेनेचा माजी खासदार असलेला तो नेता विदर्भातील असल्याची चर्चा आहे. केंद्रात मंत्रिपद देखील त्यांनी भूषवले असून ते राष्ट्रवादी काँग्रेसमध्ये सक्रीय असल्याचेही बोलले जात आहे.

या माजी खासदाराला राष्ट्रवादीकडून प्रतिसाद देण्यात आला नसल्याची माहिती आहे. दरम्यान, राष्ट्रवादीच्या बैठकीत मंत्री छगन भुजबळ यांच्या नावावर चर्चा होणार आहे. त्यांनी राज्यसभेवर जाण्याची इच्छा व्यक्त केली आहे. मात्र, त्यांच्या पुत्राला मंत्रिमंडळात स्थान मिळावे, अशी अटी त्यांनी घातल्याची माहिती आहे.

सुनेत्रा पवार घेणार निर्णय

छगन भुजबळ यांच्यासह या बैठकीत पार्थ पवार यांच्याकडून काही नावे समोर करण्यात येणार असल्याची माहिती आहे. दरम्यान, प्रमोद हिंदुराव, मंत्री छगन भुजबळ, अविनाश आदिक, समीर भुजबळ यांची नाव उमेदवारी चर्चेत आहेत. अंतिम निर्णय सुनेत्रा पवार या घेणार असून येत्या दोन दिवसांत नावाची घोषणा होण्याची शक्यता आहे.