Ravindra Chavan News : कुणकुण लागताच रवींद्र चव्हाण यांनी पुढचं बोलणं टाळलं...

Ravindra Chavan avoids comment : विधानसभा निवडणूक निकाल लागल्यानंतर राज्यातील सत्ताधारी आणि विरोधक आमदारांचे कोल्हापूर दौरा वाढलेला आहे. आपल्या कुटुंबासमवेत करवीर निवासिनी श्री अंबाबाई देवीचे दर्शन घेत पुढील पाच वर्षाच्या राजकीय प्रवासाला आशीर्वाद घेतले. भाजपसह शिवसेना राष्ट्रवादीतील अनेक नेते करवीर निवासिनी श्री अंबाबाई देवीच्या चरणी लीन झाले आहेत. त्यामुळे सातत्याने नेत्यांचे दौरे सुरू आहेत. शुक्रवारी राज्याचे माजी मंत्री आणि भाजपनेते आमदार रवींद्र चव्हाण यांनी श्री अंबाबाई देवीचे दर्शन घेतले. दर्शनानंतर त्यांनी माध्यमांशी संवाद साधला. पण राजकीय प्रश्नांची कुणकुण लागताच त्यांनी काढता पाय घेतला.

महायुती सरकारच्या हातून जनतेची अविरतपणे सेवा व्हावी, तसेच महाराष्ट्रातील जनतेला चांगले आरोग्य लाभो. प्रलंबित कामे मार्गी लागो, महायुतीमधील सर्वच नेते एकत्रितपणे जनतेच्या कामाला मार्गी लावू यासाठी मी आज देवीचे दर्शन घेतले आहे. सर्व कामात बळ द्यावे, असे साकड मी देवीला घातले असल्याचे रवींद्र चव्हाण (Ravindra Chavan) यांनी सांगितले.

मी भाजपचा कार्यकर्ता आहे. पार्टी जी जबाबदारी देईल ती जबाबदारी आम्ही प्रामाणिकपणे पार पाडत असतो. पक्ष जो जबाबदारी दिली ती देखील मी यशस्वीपणे पार पाडेन, असे सांगत मंत्रिमंडळ विस्ताराबाबत नाराजीचा मुद्दा पत्रकार बांधवांनी विचारल्यानंतर मात्र, माजी मंत्री रवींद्र चव्हाण यांनी येथून काढता पाय घेतला.

महायुतीमधील बंडखोर भाजप नेत्यांसोबत करवीर विधानसभा मतदारसंघातून काँग्रेसकडून (Congress) राहुल पाटील तर शिवसेनेकडून चंद्रदीप नरके यांनी निवडणूक लढवली. महायुती म्हणून एकत्र लढत असताना जनसुराज्य शक्तीकडून उमेदवारी मिळवत बंडखोरी केलेले संताजी बाबा घोरपडे आमदार रवींद्र चव्हाण यांच्यासोबत मंदिरात दिसले. दिवसभर ते त्यांच्यासोबत दिसल्याने घटनास्थळी अनेक तर्कवितर्क लढवले जात होते.