Ashok Chavan News : विदेशात डांबून ठेवलेल्या किंवा बेपत्ता भारतीयांची मुक्तता करा! अशोक चव्हाणांची मागणी

Parliament Session News : भाजपाचे खासदार अशोक चव्हाण यांनी विदेशात उद्योग, व्यवसाय, नोकरी निमित्त गेलेल्या भारतीय नागरिकांना होणारा त्रास, त्यांना बेकायदेशीररित्या डांबून ठेवण्याच्या प्रकाराकडे सभागृहाचे लक्ष वेधले. अशा सर्व भारतीयांची मुक्तता सरकारने करावी, अशी मागणी त्यांनी राज्यसभेत केली. नांदेडमध्ये वास्तव्यास असलेले अभियंते पांचाळ हे इराणमध्ये पाच डिसेंबर पासून बेपत्ता असल्याचेही चव्हाण यांनी सभागृहाच्या निदर्शनास आणून दिले.

संसदीय अधिवेशनात राज्यसभेत अशोक चव्हाण (Ashok Chavan) यांनी एका वेगळ्याच विषयाला हात घातला. उद्योग-व्यवसायासाठी प्रवास करणारे काही भारतीय नागरिक विदेशात बेपत्ता झाल्याचे चव्हाण यांनी सभागृहात सांगितले. पंतप्रधान नरेंद्रजी मोदी यांच्या प्रयत्नांमुळे देशात स्वयंरोजगार, लघु व मध्यम उद्योग, तसेच स्टार्टअप व्यवसाय वेगाने वाढले आहेत.

व्यावसायिक कारणांसाठी अधिकाधिक लोक विदेशात, विशेषतः मध्य पूर्वेतील इराण, कतार, युएई आणि सौदी अरेबियात प्रवास करू लागले आहेत. (BJP) मात्र या देशांमध्ये भारतीय नागरिकांना तेथील यंत्रणांकडून कोणतेही सबळ कारण न देता बेकायदेशीपणे ताब्यात घेण्याची अनेक प्रकरणे समोर आली आहेत. या प्रकरणांमध्ये राजनैतिक प्रोटोकॉलचे उल्लंघन होते आहे.

ताब्यात घेतलेल्या नागरिकांची माहिती तेथील भारतीय दूतावासांना दिली जात नाही. अशा चुकीच्या पद्धतीने विदेशात डांबून ठेवलेल्या नागरिकांच्या भवितव्याच्या चिंतेने भारतात त्यांचे कुटूंब प्रचंड तणावात येते, त्यांच्यावर अतिशय कठीण काळ ओढवतो. त्यामुळे विदेशात अकारण ताब्यात घेतलेल्या व्यक्तींना मुक्त करण्यासाठी केंद्र सरकारने योग्य ती कार्यवाही करावी, अशी मागणी अशोक चव्हाण यांनी केली.

मूळ हिंगोली जिल्ह्यातील मात्र आता नांदेड शहरात वास्तव्यास असलेले अभियंते योगेश पांचाळ डिसेंबरपासून इराणमध्ये बेपत्ता असल्याचेही अशोक चव्हाण यांनी निदर्शनास आणून दिले. यावर सरकार तातडीने योग्य ती कार्यवाही करेल आणि विदेशातील भारतीयांना सुखरूप देशात परत आणेल, अशी ग्वाही यावेळी देण्यात आली.