Sanjay Raut : शिक्षा ठोठावल्यानंतर संजय राऊतांचा संताप; जुना मुद्दा काढत थेट सरन्यायाधीश चंद्रचूड यांच्यावर घसरले  

Mumbai : शिवसेना उद्धव बाळासाहेब ठाकरे पक्षाचे खासदार संजय राऊत यांना शिवडी येथील कोर्टाने 15 दिवसांच्या कारावासाची शिक्षा ठोठावली आहे. मानहानीच्या खटल्यात सुनावण्यात आलेल्या या शिक्षेनंतर राऊत चांगलेच भडकल्याचे दिसते. त्यांनी थेट न्यायव्यवस्थेवर हल्ला चढवला.

राऊतांनी मीडियाशी बोलताना सरन्यायाधीश धनंजय चंद्रचूड यांच्याकडे बोट दाखवले. जिथे सरन्यायाधीशांच्या घरी मोदक खायला पंतप्रधान मोदी जातात, तिथे आम्हाला काय न्याय मिळणार, असे राऊत यांनी म्हटले आहे. एकीकडे न्यायालयाचा आपण आदर करत असल्याचे सांगताना त्यांनी न्यायव्यवस्थेचे संघीकरण झाल्याचा गंभीर आरोपही केला.

मेधा किरीट सोमय्या यांच्यावर राऊतांनी भ्रष्टाचाराचे आरोप केले होते. त्याविरोधात सोमय्या यांनी कोर्टात मानहानीचा दावा दाखल केला होता. या खटल्यात न्यायालयाने गुरूवारी राऊतांना 15 दिवसांच्या कैदेची शिक्षा सुनावली. तसेच 25 हजारांचा दंडही ठोठावला. या निकालाविरोधा वरच्या कोर्टात दाद मागणार असल्याचे राऊतांनी सांगितले.

राऊत म्हणाले, सुरूवातीला आपण भ्रष्टाचाराचे आरोप केले नाहीत. सगळं ऑन रेकॉर्ड आहे. मी केवळ काही प्रश्न उपस्थित केले होते. गैरव्यवहार झाल्याचं मी म्हटलं नव्हतो. कथित भ्रष्टाचारावर विधानसभेत चर्चा झालली होती. आमदार प्रताप सरनाईक यांनी राज्य सरकारला एक पत्र लिहित चौकशीची मागणी केली होती. मीरा-भाईंदर महापालिकेचा अहवाल होता. विरोधी पक्षनेत्यांनी आरोप केला.

विधानसभेत या विषयावर प्रश्न विचारले गेले. याची चौकशी करून कायदेशीर कारवाईची मागणी करण्यात आली होती. यामध्ये मी मानहानी कुठे केली?. त्याचे पुरावे न्यायालयात दिले होते, असे राऊतांनी सांगितले. मला 15 वर्षांची शिक्षा ठोठावली तरी मी सत्य बोलणं थांबवणार नाही. जनतेच्या पैशाचा अपहार होत आहे, त्यावर आम्ही काही बोलायचे नाही का? आमदार, खासदार, महापालिका सगळ्यांनी तक्रारी केल्या, पण फासावर संजय राऊतांना फासावर लटकवत आहेत, असा आरोप राऊतांनी केला.

मी कोणताही गुन्हा केलेला नाही. तो जनतेच्या हिताचा होता. तो भारतीय जनता पक्षाच्या नेत्यांना झोंबला. विधानसभेआधी त्यांना मला तुरुंगात टाकायचे आहे. कारण निवडणुका जवळ आल्या आहेत, मी लढायला तयार आहे, असेही राऊत यांनी ठणकावून सांगितले.