Eknath Shinde political news : ठाकरे बंधू एकत्र आल्याने शिंदेंना फरक पडणार नाही; घोडामैदान समोरच असल्याचा शिवसेनेच्या मंत्र्याचा इशारा

Mumbai News : आगामी काळात होत असलेल्या राज्यातील स्थानिक स्वराज्य संस्थेच्या निवडणुकीसाठी राज व उद्धव ठाकरे बंधू युती करणार असल्याची घोषणा उद्धव ठाकरे यांच्या शिवसेनेचे खासदार संजय राऊत यांनी केली. त्यासोबतच येत्या काळात मुंबई, ठाणे, कल्याण-डोंबवली व नाशिक महापालिका मनसे व उद्धव ठाकरे यांची शिवसेना एकत्रित निवडणूक लढणार असल्याची घोषणा राऊत यांनी केली. त्यानंतर सत्ताधारी व विरोधी पक्षांकडून ठाकरे बंधूंच्या युतीबाबत प्रतिक्रिया व्यक्त केल्या जात आहेत. ठाकरे बंधू एकत्र येण्याने एकनाथ शिंदेंना काहीही फरक पडणार नाही, असे मत शिवसेना नेते आणि परिवहन मंत्री प्रताप सरनाईक यांनी व्यक्त केले.

ठाकरे बंधूंच्या युतीवर शिवसेनेचे मंत्री प्रताप सरनाईक (Pratap sarnaik) यांनी धाराशीवमध्ये बोलताना प्रतिक्रिया दिली आहे. कोणी कितीही युती करू द्या, काहीही बोलू द्या, महायुतीला काहीही फरक पडणार नाही. येत्या काळात घोडामैदान समोर असल्याचे सांगत थेट इशारा दिला आहे.

हिंदी सक्तीच्या विरोधात एकत्र आलेल्या राज व उद्धव ठाकरे बंधूनी एकत्र येत वरळी येथे मेळावा घेत मोठे शक्तिप्रदर्शन केले होते. त्यानंतर आता येत्या काळात मनसे व उद्धव ठाकरे यांची शिवसेना (Shivsena) एकत्र येत निवडणूक लढणार असल्याचे आता जवळपास फायनल झाले आहे. त्यातच उद्धव ठाकरे यांच्या शिवसेनेचे खासदार संजय राऊत यांनी स्वातंत्र्यदिनाचा मुहूर्त साधत ठाकरे बंधूंच्या युतीची अधिकृत घोषणाच केली आहे. मुंबईसह ठाणे, कल्याण-डोंबवली व नाशिक या महापालिकेत मनसे व उद्धव ठाकरे यांची शिवसेना एकत्र येत निवडणूक लढणार असल्याचे त्यांनी सांगितले.

त्यानंतर सर्वस्तरातून प्रतिक्रिया व्यक्त केल्या जात आहेत. एकनाथ शिंदेंच्या शिवसेनेचे मंत्री प्रताप सरनाईक यांनी ठाकरे बंधूंच्या एकत्र येण्यावर टीका केली आहे. यावेळी सरनाईक म्हणाले, 'कोणी कितीही युती करू द्या, काहीही बोलू द्या, महायुतीला काहीही फरक पडणार नाही. सगळीकडे महायुतीचे महापौर बसतील. त्यामुळे महायुतीला चिंता करण्याची गरज नाही.'

मुंबई, ठाणे, कल्याण-डोंबवली, नाशिक सगळीकडे महायुतीचे नगरसेवक निवडून येतील. दोन्ही ठाकरे एकत्र येण्याने एकनाथ शिंदेंना काहीही फरक पडणार नाही, असे सरनाईक यांनी ठणकावून सांगितले. विधानसभा निवडणुकीत महायुतीने मोठ्या फरकाने विजय मिळवला असल्याने चिंता करण्याची गरज नसल्याचे सरनाईक यांनी स्पष्ट केले.