Uddhav Thackeray : उद्धव ठाकरेंना पोलिसांसोबतच मिळणार खासगी सुरक्षा, मोठ्या उद्योग समुहाचा पुढाकार

Uddhav Thackeray News: शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांना झेड प्लस सुरक्षा आहे. मात्र, गेल्या वर्षी त्यांच्या सुरक्षेमध्ये कपात करण्यात आली होती. ठाकरेंच्या सुरक्षेसाठी मुंबई पोलिस तैनात आहेत. मात्र, त्यांची संख्या कमी करण्यात आली होती. त्यामुळे कमी झालेल्या पोलिसांच्या स्थानी ठाकरेंच्या सुरक्षेसाठी खासगी सुरक्षा रक्षक नेमले जाणार आहेत.

उद्धव ठाकरेंना एका खासगी उद्योग समूहाकडून सुरक्षा पुरवण्यात आलेली आहे. सुरक्षा रक्षकांनी आज मातोश्रीवर पाहणी केली. मिळालेल्या माहितीनुसार ठाकरेंच्या सुरक्षेसाठी खासगी उद्योग समुहाकडून आट सुरक्षा रक्षक पुरवण्यात आलेले आहेत.

गेल्यावर्षी उद्धव ठाकरेंच्या सुरक्षेमध्ये कपात केल्यानंतर सरकारवर टीका करण्यात येत होती. त्यावेळी ठाकरेंच्या सुरक्षेमध्ये असलेली अतिरिक्त वाहने कमी केल्याचे सांगण्यात आले होते. आदित्य ठाकरे यांनी सुरक्षेच्या मुद्यावरून केंद्र सरकारवर जोरदार टीका केली होती.

उद्धव ठाकरेंच्या खासगी सुरक्षा घेण्यावरून मंत्री भरत गोगावले यांनी टीका केली आहे. त्यांच्या सुरक्षेसाठी मुंबई पोलिस असताना त्यांनी खासगी सुरक्षा घेणे म्हणजे पोलिसांवर अविश्वास दाखवण्या सारखे आहे, असे गोगावले म्हणाले.

ठाकरे परिवाराला सुरक्षा

उद्धव ठाकरे यांना झेड प्लस सुरक्षा आहे तर त्यांच्या परिवातील सदस्यांना देखील वाय प्लस सुरक्षा सरकारकडून पुरवली जात आहे. आमदार आदित्य ठाकरे, रश्मी ठाकरे यांना वाय प्लस सुरक्षा व्यवस्था देण्यात आलेली आहे.