Nashik News : 85 लाखांची रक्कम अन् तब्बल ३२ तोळे सोने! शिक्षणाधिकाऱ्यांच्या घरात सापडलेले घबाड बघून अधिकारी चक्रावले

Nashik Bribe News : नाशिक (Nashik) महापालिकेच्या शिक्षणाधिकारी सुनीता धनगर यांना लाचलुचपत प्रतिबंधक विभागाने (ACB) शुक्रवारी अटक केली होती. पन्नास हजारांची लाच स्वीकारताना एसबीने त्यांना ताब्यात घेतले होते. धनगर यांच्यासह एका कर्मचाऱ्यास देखील ताब्यात घेण्यात आले होते. त्यानंतर शनिवारी एसीबीने सुनीता धनगर यांच्या घरावर धाड टाकली. त्यामध्ये अनेक धक्कादायक गोष्टी समोर आल्या आहेत.

सुनिता धनगर (Sunita Dhangar) यांच्या लाचखोरीमुळे महापालिकेच्या (Municipality) शिक्षण विभागातील भ्रष्ट कारभार चव्हाट्यावर आला. सुनिता धनगर यांच्याकडे घराच्या झडतीमध्ये एसीबीला मोठी रोख रक्कम आणि कोट्यवधींची मालमत्ता हाती लागली. घरात तब्बल ३२ तोळे सोने आणि ८५ लाखांची रोख रक्कम मिळाली.

त्याच प्रमाणे सुनिता धनगर यांच्या नावावर दोन फ्लॅट आणि एक प्लॉट असल्याची माहिती एसीबीने दिली. आडगाव येथे प्लॉट असून एक फ्लॅट टिळकवाडी व दुसरा फ्लॅट उंटवाडी येथे आहे. त्या राहत असलेला फ्लॅट 3bhk असून त्याची किंमत जवळपास दीड कोटी रुपये आहे.

दरम्यान, न्यायालयाने एका संस्थेला शिक्षकाला कामावर रुजू करण्याचे आदेश देऊनही संस्था निलंबन लावत होती. त्यामुळे याविषयी दाद मागण्यासाठी संबंधित शिक्षकाने सुनिता धनगर यांच्याकडे तक्रार केली होती. त्यासंदर्भातील आदेश काढण्यासाठी धनगर यांनी ५० हजार व त्या कार्यालयातील लिपीक नितीन जोशी याने पाच हजार रुपये शिक्षकाकडे मागितले होते. ते पैसे देत असतानाच एसीबीने धाड टाकली होती.