Kedgaon double murder case : केडगाव दंगलप्रकरणी मोठा निकाल! अनिल राठोडांसह 600 शिवसैनिक निर्दोष; 2018चे खळबळजनक प्रकरण

Ahilyanagar Kedgaon case : अहिल्यानगरच्या केडगावमध्ये 2018 मध्ये शिवसेना कार्यकर्त्यांच्या घडलेल्या दुहेरी हत्याकांडानंतर उसळलेल्या दगडफेक आणि रस्ता रोको प्रकरणी अखेर मोठा न्यायालयीन निकाल लागला आहे.

शिवसेनेचे दिवंगत उपनेते माजी आमदार अनिल राठोड यांच्यासह तब्बल 600 शिवसैनिकांवर दाखल करण्यात आलेल्या गुन्ह्यात न्यायालयाने सर्व आरोपींची निर्दोष मुक्तता केली आहे. सबळ पुरावे सादर करण्यात पोलिसांना अपयश आल्याने न्यायालयाने हा निर्णय दिल्याची माहिती समोर आली आहे.

एप्रिल 2018 मध्ये केडगाव परिसरात शिवसेनेचे (Shivsena) उपशहर प्रमुख संजय कोतकर आणि कार्यकर्ते वसंत ठुबे यांची गोळ्या झाडून हत्या करण्यात आली होती. या दुहेरी हत्येनंतर संपूर्ण परिसरात तणावाचे वातावरण निर्माण झाले होते. संतप्त शिवसैनिक आणि नागरिक मोठ्या संख्येने रस्त्यावर उतरले होते.

या घटनेनंतर दगडफेक, रस्ता रोको, पोलिसांना (Police) शिवीगाळ, सरकारी कामात अडथळा आणि मृतदेहाची अवहेलना केल्याच्या आरोपांवरून कोतवाली पोलिस ठाण्यात मोठा गुन्हा दाखल करण्यात आला होता.

या प्रकरणात सुरुवातीला पोलिसांनी भादंवि कलम 308 अर्थात ‘सदोष मनुष्यवधाचा प्रयत्न’ हे गंभीर कलम लावले होते. मात्र पुढील तपासादरम्यान हे कलम वगळण्यात आले आणि इतर वाढीव कलमांचा समावेश करण्यात आला. त्यामुळे या प्रकरणाच्या तपासावरही अनेक प्रश्न उपस्थित झाले होते.

त्या काळात आमदार अनिल राठोड यांनी पोलिस कारवाईवर जोरदार आक्षेप घेतला होता.केडगावमधील दगडफेक शिवसैनिकांनी केली नसून, हत्येनंतर निर्माण झालेल्या भीतीच्या वातावरणातून आणि नातेवाईकांच्या आक्रोशातून गोंधळ उडाला होता. शिवसेनेचा या प्रकाराशी थेट संबंध नसताना खोटे गुन्हे दाखल करण्यात आले, असा आरोप त्यांनी केला होता.

दरम्यान, 2020 मध्ये कोरोनाच्या काळात अनिल राठोड यांचे निधन झाले. त्यानंतरही न्यायालयात या प्रकरणाची सुनावणी सुरू होती. अखेर आठ वर्षानंतर आता या खटल्याचा निकाल लागला असून सर्व आरोपींना मोठा दिलासा मिळाला आहे.