Ajit Pawar Death : दादांची शेवटची सही सुद्धा स्मशानभूमीच्या कामासाठी, दुर्दैवी योगायोग सांगताना सरोज अहिरेंना अश्रू आवरेना

Ajit Pawar death : राज्याचे उपमुख्यमंत्री व राष्ट्रवादीचे अध्यक्ष अजित पवार यांचे बुधवारी (दि. 28 जानेवारी) बारामती येथे विमान अपघातात दुर्दैवी निधन झाले. अजित पवार यांच्यासह पाच जणांचा या अपघातात मृत्यू झाला. या घटनेने संपूर्ण महाराष्ट्रावर शोककळा पसरली असून ठिकाठिकाणी शोकसभा होत आहेत.

उपमुख्यमंत्री अजित पवार यांचे निधन झाल्याने देवळाली विधानसभा मतदारसंघात शोकसभेचे आयोजन करण्यात आले होते. या शोकसभेत राष्ट्रवादीच्या आमदार सरोज अहिरे या भावूक झाल्याचे पाहायला मिळाले. दादांची शेवटची सही सुद्धा माझ्या मतदारसंघातील स्मशानभूमीच्या कामासाठी होती, हा दुर्देवी योगायोग सरोज अहिरे यांनी यावेळी सांगितला.

शोकसभेत भाषणा दरम्यान सरोज अहिरे यांचे डोळे पाणावले होते. त्यांच्या डोळ्यातून अश्रू येत होते. त्या म्हणाल्या, दादा गेले हे मन आजूनही मानायला तयार नाही. ते आवाज देतील असे वाटते. आपल्याला मुंबईत बोलावतील, असे वाटते. एका फाईलमुळे अजितदादांची वेळ चुकली. मुंबईहुन मंगळवारीच संध्याकाळीच कारने अजित पवार निघणार होते. परंतु विदर्भातील धान खरेदीच्या एका फाईलवर अजित पवार यांची सही हवी होती. त्यासाठी दादा मुंबईला थांबले नाहीतर गाडीने निघून जाणार होते. ते गाडीने निघून गेले असते तर ते आज आपल्यात असते अशी खंत सरोज अहिरे यांनी व्यक्त केली.

अजितदादांनी माझ्यासारख्या सामान्य मुलीला आमदार केलं. माझ्या वडिलांचे निधन झाले त्यावेळी मी लहान होते. बाप वारला हेही कळत नव्हते. पण आता माझा दादाही गेला. माझे आयुष्य घेतले असते तरीही चालले असते. पण, माझा दादा, शेतकऱ्यांचा नेता पाहिजे होता. दादांनी घाणेरडे राजकारण कधीही केले नाही, अशा भावना सरोज अहिरे यांनी व्यक्त केल्या.

अजित दादांनी शेवटची सही माझ्या मतदारसंघातील सय्यद पिंपरी गावाच्या स्मशानभूमीसाठी केली. स्मशानभूमीच्या कामासाठी 1 कोटी रुपये मंजूर करत त्या फाईलवर शेवटची सही दादांनी केली. शेवटचं काम दादांनी माझ्यासाठी केलं. मला आणि माझ्या मुलाला त्यांनी आशीर्वाद दिला होता. कसे विसरणार मी त्यांना आणि कसे अश्रु थांबणार असं सरोज अहिरे म्हणाल्या.

आम्ही सर्व आमदार पवार कुटुंबाच्या पाठीमागे उभे राहू. पक्षाचा आदेश आला आहे, त्यामुळे मला मुंबईला जावे लागत आहे. काय घडतंय काय नाही माहित नाही पण पक्षाचा आदेश आहे जावे लागेल. त्यासाठी तुमच्या सगळ्यांची रजा घेऊन मुंबईला निघत असल्याची माहिती त्यांनी शोकसभेत दिली.

दादा गेले, आज माझा खूप मोठा आधार हरपला आहे. काम करत आलोय, काम करत राहू, ही दादांची शिकवण होती. त्यानुसार आम्ही काम करतच राहणार आहोत. दादा पुन्हा येतील, आमचे वाईट स्वप्न निघून जाईल असे वाटते. देवा जिथे कुठे असशील तर आमच्या दादाला पुन्हा आण अशी आर्त साद त्यांनी घातली. दादाचे आणि माझे रक्ताचे नाते नव्हते. पण, त्यांनी मला खूप प्रेम दिले. शेवटची सही माझ्या मतदारसंघाच्या कामासाठी केली. मी आयुष्यभर कधीही राष्ट्रवादी सोडणार नाही, असं सरोज अहिरे म्हणाल्या.