Nashik NMC News : नाशिकमध्ये सलग दुसऱ्यांदा भाजपने स्पष्ट बहुमत मिळवलं आहे. यंदाच्या महापालिका निवडणुकीत ७२ जागांसह सर्वांत मोठा पक्ष ठरल्याने महापौरपदावर भाजपचा दावा निर्विवाद झाला आहे. परंतु स्पष्ट बहुमत मिळवूनही भाजपकडून सत्तास्थापनेसाठी महायुतीचा मार्ग स्वीकारण्याचे संकेत मिळत आहेत.
राज्यात महायुतीमधील भाजप, शिवसेना व राष्ट्रवादी असे तीन्ही पक्ष सत्तेत आहेत. त्या पार्श्वभूमीवर नाशिकमध्ये शिवसेना आणि राष्ट्रवादी काँग्रेस यांना सत्तेत सहभागी करून घेण्याच्या हालचाली सुरू असून, त्यासंदर्भातील प्रस्ताव भाजप कार्यालयामार्फत प्रदेश कार्यालयाकडे पाठविण्यात आल्याची माहिती आहे. मुंबई ठाण्यातील सत्ता स्थापनेच्या तडजोडीतून या दोन्ही पक्षांना भाजपने नाशिकमध्ये सत्तेत सहभागी करुन घेतल्याची चर्चा आहे.
दरम्यान भाजप शहराध्यक्ष सुनील केदार यांनी देखील या हालचालींना दुजोरा दिला आहे. नाशिक महापालिकेत भाजप, शिवसेना शिंदे गट व राष्ट्रवादी काँग्रेस (अजित पवार गट) आम्ही एकत्र येऊन काम करावे, असे आमचे मत आहे. राज्यात व केंद्रात आम्ही तिन्ही पक्ष सत्तेत एकत्र आहोत. त्यामुळे नाशिक महापलिकेत देखील महायुती म्हणून एकत्र काम करावे, असे आम्हाला वाटत असल्याचे मत प्रदेशाध्यक्ष सुनिल केदार यांनी माध्यमांशी बोलताना व्यक्त केले आहे.
प्रत्यक्ष निवडणूक काळात महापालिकेत भाजपने मित्र पक्ष असलेल्या शिवसेना व राष्ट्रवादीला युतीसाठी प्रतिसाद न दिल्याने शिवसेना व राष्ट्रवादीने युतीची घोषणा करत निवडणूक लढवली. यातून आपोआप भाजपचा स्वबळाचा मार्ग मोकळा होऊन भाजने स्वतंत्रपणे निवडणूक लढवली. नाशिक महापालिकेच्या १२२ जागांपैकी भाजपला स्वबळावर ७२ जागा मिळाल्या. शिवसेनेला २६, राष्ट्रवादी काँग्रेसला तीन जागा मिळाल्या.
मग, स्पष्ट बहुमत असूनही शिवसेना व राष्ट्रवादी काँग्रेसला नाशिकमध्ये सत्तेत सहभागी करून घेण्याची भूमिका भाजपकडून घेतली जात असल्याने ही भाजपची तडतोड असल्याच्या चर्चा रंगल्या आहेत. त्यामागे विशेष करुन मुंबई, ठाणे व कल्याण-डोंबिवली महापालिकांतील सत्तास्थापनेसाठी भाजपला करावी लागलेली तडजोड नाशिकमध्येही लागू केली जात असल्याची राजकीय चर्चा आहे. नाशिकमध्ये शिवसेनेला सोबत घेऊन भाजपला मुंबईच्या महापौर पदाच्या खूर्चीवर विराजमान होण्याची खेळी खेळायची असल्याचे बोलले जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.