धुळ्यात राष्ट्रवादीला धक्का; भाजपचे निर्विवाद यश

धुळे : राज्यातील ग्रामपंचायत निवडणुकांचे निकाल जाहीर होत आहेत. उत्तर महाराष्ट्रातील धुळे (Dhule) जिल्ह्यात भाजपने (BJP) निर्विवाद यश संपादित केले. धुळे जिल्ह्यातील सर्व ग्रामपंचायतींचे (Grampanchayat Election) निकाल हाती आले आहेत. त्यामध्ये 33 पैकी 32 जागांवर भाजपने विजय मिळवला आहे. राष्ट्रवादी काँग्रेसला (NCP) एका जागेवर समाधान मानावे लागले आहे.

राज्यातील ५४७ ग्रामपंचायतींच्या निवडणुकीसाठी रविवारी मतदान झाले. या सर्व ग्रामपंचायतींची मतमोजणी आज होत आहे. दरम्यान, धुळे जिल्ह्यातील 33 ग्रामपंचायत निवडणुकांचा निकाल हाती आला आहे. यातील तब्बल 32 जागांवर भाजपने निर्विवाद सत्ता मिळवली आहे. तर एका जागेवर राष्ट्रवादी काँग्रेसने मोहोर उमटवली आहे.

शिवसेना, शिंदेगट व इतर पक्षाला भोपळाही फोडता आला नसल्याचे चित्र आहे. धुळे जिल्ह्यातील 33 ग्रामपंचायतीसाठी रिमझिम पावसातही नागरिकांनी मतदानाचा हक्क बजावला होता. ग्रामपंचायत निकालात भाजपने सुरवातीपासून आघाडी घेतल्याचे दिसून आले. तर शेवटपर्यंत भाजपने सर्वच जागा जिंकून राष्ट्रवादीला एका जागेवर समाधान मानावे लागले.