Nashik Municipal Election : जागा वाटपावरून तणाव : भाजपकडून फारच कमी जागांची ऑफर, नाराज शिवसेनेचा पुढचा निर्णय कोणता?

Nashik Politics : आगामी कुंभमेळा नाशिकमध्ये होत असल्याने भाजपला नाशिक महापालिका निवडणुकीत कोणत्याही परिस्थितीत सत्ता मिळवायची आहे. त्यासाठी भाजपने फार आधीच 'शंभर प्लसचा' नारा दिला आहे. त्यासाठी अन्य पक्षातील नेत्यांना गळाला लावत मोठे इनकमिंग भाजपने घडवून आणले.

भाजपच्या शंभर प्लसच्या घोषणेमुळे नाशिक महापालिका निवडणुकीसाठी महायुतीसंदर्भात अद्याप अनिश्चितता आहे. भाजपच्या 'एकला चलो रे च्या संकेतातून शिवसेना देखील आता सावध झाली असून स्वबळ अजमावण्याची तयारी सुरु केली आहे. त्यासाठी मागच्या निवडणुकीत दोन नंबरची मते पडलेल्या उमेदवारांची चाचपणी सुरु आहे. तसेच नियोजनबद्ध प्रचार करण्यासाठी पक्षाच्या वतीने वॉररुम तयार करण्याचे काम सुरु आहे.

महापालिका निवडणुकीत शिवसेनेने भाजपकडे सुरुवातीला ६० जागांची मागणी केली होती. परंतु, भाजपकडून या मागणीला अपेक्षित प्रतिसाद मिळाला नाही. त्यानंतर थोडे-फार इकडे करण्याचा निरोप देण्यात आल्यानंतरही भाजपने प्रतिसाद दिला नाही. भाजपकडून शिवसेनेला फक्त ३० जागांची ऑफर दिली जाण्याची शक्यता असल्याने शिवसेना नाराज असल्याची माहिती सूत्रांनी दिली.

महायुतीत शिवसेनेला अधिक जागा हव्या असून भाजप त्या द्यायला तयार नाही. भाजपने सध्या तरी ८५ जागांवर निवडून येणारे उमेदवार निश्चित केले आहेत. साधरण त्यात ८० ते ८२ जागांवर भाजप, तीस जागा शिवसेनेला तर दहा जागा राष्ट्रवादी काँग्रेस पक्षाला देण्याचा विचार भाजपचा आहे. शिवसेनेला ही ऑफर मान्य नसल्यास शिवसेनेला सोडून भाजप व राष्ट्रवादी काँग्रेस अशी युती करण्याचा देखील विचार असल्याचे समजते.

भाजपची भूमिका मान्य नसल्याने शिवसेनेने स्वबळाची तयारी सुरु केली आहे. त्याचा भाग म्हणून उपमुख्यमंत्री एकनाथ शिंदे व खासदार डॉ. श्रीकांत शिंदे पुढील आठवड्यात नाशिक दौऱ्यावर येणार आहेत. एकनाथ शिंदे स्वत: महापालिका निवडणुकीचा आढाव घेणार असून त्यावेळी शिवसेनेची भूमिका अधिक स्पष्ट होईल. भाजप सोबत युती झाली तर ठीक नाहीतर स्वबळाची तयारी ठेवण्याच्या सूचना फार आधीच शिवसेना नेत्यांना देण्यात आल्या आहेत.