Maharashtra Politics : भाजपला शिंदेंनी जिवंत केलं... शिवसेना आमदाराच्या वक्तव्यांनी महायुती घायाळ, फडणवीसांबद्दलही मोठा गौप्यस्फोट

Maharashtra political news : गेल्या काही महिन्यांपासून महाराष्ट्राच्या राजकारण मुख्यमंत्री देवेंद्र फडणवीस हे दिल्लीत जाणार असल्याच्या चर्चा आहेत. मात्र, दस्तूरखुद्द मुख्यमंत्र्यांनीच या वृत्ताचे खंडन करुन आपण कुठेही जाणार नसून महाराष्ट्रात राहणार असल्याचे स्पष्ट केले आहे. पण महायुतीमधील शिवसेना पक्षाच्या आमदाराच्या वक्तव्याने राजकीय वर्तुळात खळबळ उडाली आहे.

उपमुख्यमंत्री एकनाथ शिंदे यांच्या नेतृत्वातील शिवसेनेचे विधान परिषदेचे आमदार चंद्रकांत रघुवंशी यांच्या वक्तव्याने महायुती घायाळ झाली आहे. काल त्यांनी एकनाथ शिंदे यांनी उठाव केल्याने राज्यात भाजप जिवंत झाला, असे विधान केले होते. तर आता मुख्यमंत्री फडणवीस हे लवकरच दिल्लीत जाणार असल्याचा गौप्यस्फोट त्यांनी केला आहे.

भारतीय जनता पक्षाला जिवंतच एकनाथ शिंदे यांनी करुन दिलं. राज्यात भारतीय जनता पक्षाचे अस्तित्वच राहिलं नव्हतं. महाविकास आघाडी सत्तेत होती. एकनाथ शिंदेंनी उठाव केल्यावरच भाजप सत्तेत आल्याचा दावा रघुवंशी यांनी केला.

आता नंदूरबार येथे माध्यमांशी बोलताना आमदार रघुवंशी यांनी पुन्हा एकनाथ शिंदे यांच्यावर स्तुती सुमने उधळली आहेत. राज्याची धुरा पात्र आणि योग्यपणे सांभाळणार कोण असेल तर एकनाथ शिंदे आहेत. एकनाथ शिंदे यांनी अडीच वर्षांच्या कार्यकाळात लोकांच्या हृदयामध्ये स्थान मिळवल्याचे ते म्हणाले.

देवेंद्र फडणवीस केंद्रात जाणार असल्याची माहिती मिळत आहे असा गौप्यस्फोटही रघुवंशी यांनी केला आहे. महाराष्ट्राचे नेतृत्वसुद्धा केंद्रात पाहिजे म्हणून देवेंद्र फडणवीस केंद्रात गेले तर मग राज्याची धुरा कोण सांभाळेल. तर त्यासाठी पात्र आणि योग्य एकनाथ शिंदे आहेत. एकनाथ शिंदे पुन्हा मुख्यमंत्री व्हावेत, अशी अपेक्षा आमदार चंद्रकांत रघुवंशी यांनी व्यक्त केली.

गावितांवर निशाणा

चंद्रकांत रघुवंशी यांनी भाजप नेते विजयकुमार गावितांच्या मंत्रिपदावरही भाष्य केलं. ते म्हणाले की, एकनाथ शिंदे यांच्यामुळेच डॉ. विजयकुमार गावित यांनाही मंत्रिपद मिळालं आहे. एकनाथ शिंदे यांच्यामुळेच डॉ. विजयकुमार गावित यांची लॉटरी लागली. गावितसाहेब अडीच वर्षे आदिवासी विकास मंत्री राहिले आहेत, असं म्हणत रघुवंशी यांनी गावितांवर निशाणा साधला.