Chhagan Bhujbal : नाशिकमध्ये आपले 7 आमदार, इथेही शक्ती लावा.. रायगडचं उदाहरण देत भुजबळांनी टाकला पालकमंत्रीपदाचा बॉम्ब

Chhagan Bhujbal : नाशिकच्या पालकमंत्री पदावरुन बोलताना आता ध्वजारोहण करतोय, हळू हळू पुढे जाऊ असं विधान १५ ऑगस्ट रोजी भाजपचे मंत्री गिरीश महाजन यांनी केलं होतं. आता पुन्हा धुळ्यातील एका कार्यक्रमात बोलताना 'मी नाशिकचा पालकमंत्री होतोय' असा दावा महाजन यांनी केला आहे. त्यामुळे पालकमंत्रीपदाचा वाद आता आणखी वाढला आहे.

नाशिकच्या पालकमंत्रीपदावरुन राष्ट्रवादीचे जेष्ठ नेते छगन भुजबळ व मंत्री गिरीश महाजन यांच्यात रस्सीखेच सुरु झाल्याचे पाहायला मिळत आहे. नाशिकमध्ये आमचे (राष्ट्रवादीचे) सात आमदार आहेत, त्यामुळे पालकमंत्रीपद आम्हाला मिळायला हवं अशी भूमिका भुजबळांनी घेतली आहे. भुजबळ म्हणाले, रायगड मध्ये आमची एकच सीटी असताना आम्ही पालकमंत्रीपदाचा आग्रह धरतो. त्यामुळे मी आमच्या लोकांना सांगेल की, नाशिकमध्ये आपले सर्वांधिक 7 आमदार आहेत. त्यामुळे रायगडप्रमाणे नाशिकसाठी सुद्दा तेवढाच आग्रह धरावा असं भुजबळांनी म्हटलं आहे.

भुजबळ पुढे म्हणाले, कोण पालकमंत्री होणार हा मुद्दा महत्वाचा नाही. तर, जर सात आमदार एकाच पक्षाचे असतील तर त्या पक्षाला पालकमंत्रीपद मिळायला हवे असे मला वाटते. यासंदर्भात मी अजित पवार आणि सुनील तटकरे यांच्याशी बोलणार आहे असं भुजबळांनी माध्यमांशी बोलताना सांगितलं. तसेच पालकमंत्री पद मिळाले तर इच्छुक नाही तर नाही. 26 जानेवारी आणि 15 ऑगस्टचे झेंडावंदन मी सर्वात जास्त वेळा केलं आहे. मी 1991 पासून झेंडावंदन करत आलो आहे. त्यामुळे मला त्याचे काही दुःख नाही असंही भुजबळांनी म्हटलं आहे.

दरम्यान यासंदर्भात गिरीश महाजन यांनी देखील स्पष्टीकरण दिलं आहे. मी पालकमंत्री होतोय असे मी कुठेही बोललेलो नाही असं महाजन यांनी स्पष्ट केलं आहे. पालकमंत्रीपदाबाबत मी कोणताही दावा करणार आहे. आमचे वरिष्ठ नेते आणि मुख्यमंत्री त्यासंदर्भात निर्णय घेतील. मुख्यमंत्री जो निर्णय घेतील तो मला मान्य असेल असं महाजन यांनी म्हटलं आहे.

लोक मला पालकमंत्री बोलत होते. पण मी त्यांना बोललो की, पालकमंत्री अजून होणार आहे. पालकमंत्री पदासाठी मी कोणतेही आंदोलन केले नाही किंवा बोर्ड लावले नाहीत. तसेच ज्यांनी हे बोर्ड लावले होते त्यांना काढायला लावले. झेंडावंदन केलं म्हणून पालकमंत्री झालो असे नाही पालकमंत्रीपदासाठी माझी आग्रही भूमिका नाही असं महाजन यांनी म्हटलं आहे.