Chhagan Bhujbal : अजितदादांचा एकदाही नाही पण भुजबळांचा दोन ते तीन वेळा आला योग, मुख्यमंत्रीपदावरुन नेमकं काय म्हणाले?

Maharashtra Politics : महिलांना मुख्यमंत्री पदावर संधी मिळाली पाहीजे. राज्यात महिला मुख्यमंत्री व्हावा असे सर्वांना वाटते. परंतु अद्याप तसे शक्य झालेले नाही. मलाही कित्येक वर्षांपासून मुख्यमंत्री व्हावं वाटतं आहे. पण तसा योग कुठेही जुळून आलेला नाही अशा भावना एका कार्यक्रमात बोलताना उपमुख्यमंत्री अजित पवार यांनी व्यक्त केल्या. त्यानंतर राजकीय वर्तुळात चर्चेला उधाण आलं आहे. माजी मंत्री छगन भुजबळ यांना यासंदर्भात विचारले असता त्यांनी देखील यासंदर्भात आपली प्रतिक्रिया दिली आहे.

छगन भुजबळ हे नाशिकमध्ये माध्यमांशी बोलत होते. ते म्हणाले, माझ्या आयुष्यात दोन ते तीन वेळा मुख्यमंत्री बनण्याचा योग होता. तो येऊन गेला. काँग्रेस मधून जाताना देखील तुम्ही जाऊ नका तुम्हाला मुख्यमंत्री करतो असे सांगितले होते. तरी पण मी शरद पवार यांच्या सोबत गेलो. मुख्यमंत्री होण्याची इच्छा सर्वांनी धरायला हरकत नाही. राजकारणात सगळे अपेक्षा घेऊनच येत असतात, मेहनत करावी योग नक्की येईल अशी प्रतिक्रिया भुजबळांनी दिली.

भुजबळांनी यावेळी वेगवेगळ्या मुद्द्यावर भाष्य केलं. जातनिहाय जनगणनेवरही मत मांडलं. समता परिषद निर्माण झाल्यानंतर आम्ही अनेक रॅली काढल्या. त्यात आमची पहिली मागणी जातिनिहाय जनगणना करा अशीच होती. देशाला स्वातंत्र्य मिळाल्यानंतर जनगणना झाली मात्र जातिनिहाय जनगणना झालेली नाही. 52 टक्के ओबीसी समाज आहे म्हणून आम्हाला 27 टक्के आरक्षण मिळाल्याचे भुजबळ म्हणाले.

लाडकी बहिण योजनेवर बोलताना भुजबळ म्हणाले, दलित व आदिवासी समाजासाठी वेगळे निधी असतात. सध्या लाडकी बहीण योजनेचे पैसे वेगवेगळ्या मार्गांनी गोळा करून पूर्तता करण्यात येत आहे. हळूहळू जसे राज्याचे उत्पन्न वाढेल तेव्हा लाडकी बहीण योजनेसाठी स्वतंत्र निधी उभा राहील.

...तर भुजबळ मुख्यमंत्री झाले असते

दरम्यान संजय राऊत यांनी देखील यासंदर्भात मत व्यक्त करताना छगन भुजबळ हे शिवसेनेत असते तर मुख्यमंत्री झाले असते असे म्हटले आहे. तसेच अजित पवार भाजपसोबत राहून मुख्यमंत्री होणार नाहीत असा टोला राऊतांनी लगावला. त्यांना मुख्यमंत्री होण्यासाठी भाजपमध्ये विलीन व्हावं लागेल असंही त्यांनी म्हटलं.