Congress Protest : महायुती सरकारचा धिक्कार करणार ; कॉंग्रेस नेते खाणार शेतकऱ्यांसोबत 'पिठलं भाकरी' अन् ठेचा..

Congress Protest : राज्यातील शेतकऱ्यावर यावर्षी मोठे संकट ओढावले आहे. अतिवृष्टीमुळे बळीराजा उद्ध्वस्त झाला आहे. लोखो एकरवरील शेतीपिके नष्ट झाली आहेत. अशा परिस्थितीत त्याला भरीव पॅकेज व कर्जमाफी देण्याची आवश्यकता होती. परंतु सरकारने जाहीरे केलेले पॅकेज पुरेसे नाही. शेतकऱ्यांसाठी केलेली मदत तुटपुंजी असून महायुती सरकारच्या या निर्णयाचा विरोध करण्यासाठी काँग्रेसने आंदोलनाची हाक दिली आहे.

जगाचा पोशिंदा बळीराजावर काळी दिवाळी करण्याची वेळ सरकारने आणल्याचा आरोप कॉंग्रेसने केला आहे. त्यामुळे सोमवार, २० ऑक्टोबर रोजी राज्यभर शेतकऱ्यांसोबत पिठलं, भाकरी व ठेचा खाऊन आंदोलन करणार असल्याचे कॉंग्रेस पक्षाकडून जाहीर करण्यात आले आहे. सर्व जिल्ह्यांतील गावागावात हे आंदोलन होणार आहे. पक्षाचे कार्यकर्ते आणि शेतकरी एकत्र येऊन पिठलं-भाकर आणि ठेचा खाऊन भाजप -महायुती सरकारचा धिक्कार करणार आहेत.

काँग्रेस नेत्यांचे म्हणणे आहे की, 'बळीराजा उद्ध्वस्त झाल्याने त्याला भरीव मदत आणि कर्जमाफीची आवश्यकता होती. पण सरकारने बनावट पॅकेज देऊन शेतकऱ्यांची दिवाळी काळी केली आहे. राज्यातील ३० जिल्ह्यांतील ३५० तालुक्यांमध्ये पाऊस आणि पुरामुळे सर्व काही वाहून गेले. राज्यात बळीराज्याच्या लाखो एकर शेतीचे नुकसान झाले आहे.

शेतकऱ्याला हेक्टरी ५० हजार रुपये, जमीन खरडून गेली त्यासाठी हेक्टरी ५ लाख रुपये व सरसकट कर्जमाफी करण्याची मागणी काँग्रेसने केली होती. पण भाजपा महायुती सरकारने जुन्याच योजनांची गोळाबेरीज करून ३२ हजार कोटींचे पॅकेज जाहीर केले, पण हे पॅकेज फसवे निघाले आहे असा आरोप कॉंग्रेस नेत्यांनी केला आहे.

शेतकऱ्यांना दिवाळीच्या आधी मदत देऊ असे सरकारने दिलेले आश्वासनही फसवे निघाल्याचा आरोप कॉंग्रेसने केला आहे. याविरोधात प्रदेश काँग्रेसने सर्व जिल्हाध्यक्ष आणि कार्यकर्त्यांना २० ऑक्टोबर रोजी प्रत्येक गावात जाऊन शेतकऱ्यांसोबत निषेध करण्याचे आवाहन केले आहे. काँग्रेस पक्ष शेतकऱ्यांबरोबर पिठलं भाकर आंदोलन करणार आहे. जेणेकरून सरकारला शेतकऱ्यांच्या वेदनांची जाणीव करून देता येईल अशी माहिती प्रदेश काँग्रेसने दिली आहे.