Devendra Fadnavis : मुख्यमंत्र्यांनी मांडले कुंभमेळ्याचे 'व्हिजन'; म्हणाले, मोठी कामे करताना थोडा त्रास होणारच!

Devendra Fadnavis News : मुख्यमंत्री देवेंद्र फडणवीस यांच्या उपस्थितीत आज कुंभमेळ्याच्या प्रकल्पांचे भूमिपूजन झाले. यावेळी त्यांनी सुमारे सहा हजार कोटींच्या कामांना सुरुवात केली. यानिमित्ताने कुंभमेळ्याचे व्हिजन त्यांनी मांडले. मुख्यमंत्री देवेंद्र फडणवीस यांचा आजचा दौरा नाशिककरांसाठी विविध संदर्भ असलेला होता. त्यात कुंभमेळा हा मुख्य विषय होता. कुंभमेळ्याची भव्य दिव्य सुरुवात झाली, असा दावा यानिमित्ताने करण्यात आला.

कुंभमेळ्याच्या विविध प्रकल्पांनी नाशिक आणि त्र्यंबकेश्वर रस्त्यावरील नागरिक व शेतकरी बाधित झाले आहेत. ऐतिहासिक संदर्भ असलेली भालेकर शाळा पाडण्यात येणार आहे. पार्श्वभूमीवर विविध राजकीय पक्ष सरकार विरोधात आंदोलन करीत आहेत. विशेषता त्र्यंबकेश्वर येथील शेकडो शेतकऱ्यांची घरे पाडण्यात आली. त्या लगतची बांधकामे एनएमआरडीए कडून भुईसपाट करण्यात आली. त्या विरोधात शेतकरी आणि नागरिकांमध्ये प्रचंड रोष आहे. या बाधितांना भरपाई मिळणार की नाही हा मोठा प्रश्न आहे.

पार्श्वभूमीवर मुख्यमंत्र्यांनी मोठे प्रकल्प करण्याचे शासनाचे नियोजन आहे. सिंहस्थ कुंभमेळा नव्हे तर त्यानंतरही नाशिक आणि त्र्यंबकेश्वरला येणाऱ्या नागरिकांना समाधान वाटेल अशी कामे होत आहेत. त्या दृष्टीने शासनाने अतिशय मोठे नियोजन आणि निधी उपलब्ध केला आहे. काही मोठे प्रकल्प करताना त्याचा समाजाला त्रास होतो.

कुंभमेळ्याच्या कामाने देखील काही लोकांना त्रास होणार आहे. हे समजून घेतले पाहिजे. मात्र शासन कोणालाही वाऱ्यावर सोडणार नाही. ज्यांच्या जमिनी घेतल्या जातील त्यांना भरपाई दिली जाईल. काहींचे पुनर्वसन देखील करण्यात येईल. सरकार कोणालाही संकटात टाकणार नाही, असा दिलासा मुख्यमंत्र्यांनी यानिमित्ताने दिला. यावेळी त्यांनी माध्यमे आणि विरोधकांनाही स्पष्ट संदेश दिला. कुंभमेळ्यात अनेक मोठी कामे होत आहेत. मात्र पत्रकारांनी केवळ टेंडर आणि टेंडर याच्याच बातम्या देऊ नये. अन्य चांगले विषय देखील आहेत, त्यावर प्रकाशझोत टाकला पाहिजे, असे सूचक विधान मुख्यमंत्र्यांनी केली.

त्र्यंबकेश्वर रस्त्यावरील बाधित शेतकऱ्यांचे गेले काही दिवस आंदोलन सुरू आहे. सत्ताधारी आमदारांच्या माध्यमातून त्यांनी मुख्यमंत्र्यांची भेट देखील घेतली होती. मुख्यमंत्र्यांनी त्यांना आश्वासन दिले होते. पार्श्वभूमीवर मुख्यमंत्री त्रंबकेश्वरच्या शेतकऱ्यांना वेळ देतील अशी अपेक्षा होती, मात्र तसे घडले नाही. मुख्यमंत्र्यांनी या शेतकऱ्यांना स्पष्टच संदेश दिला आहे. त्यामुळे हे शेतकरी आंदोलन काय भूमिका घेतात याकडे आता उत्सुकता लागली आहे.