Devendra Fadnavis Nashik : मुख्यमंत्री नाशिकमध्ये पाऊल ठेवण्याआधीच भाजपची ताकद वाढली, दिग्गजांचे प्रवेश महाजनांनी उरकवले

Nashik politics : मुख्यमंत्री देवेंद्र फडणवीस आज नाशिकमध्ये आहेत. कुंभमेळा विकासकामांच्या व नाशिक जिल्हापरिषदेच्या नवीन इमारतीच्या उद्घाटनाच्या निमित्ताने ते नाशिकमध्ये आले असले तरी यानिमित्ताने भाजपतर्फे जाहीर सभेचे नियोजन करण्यात आल्याने मुख्यमंत्र्यांच्या सभेतून प्रचाराचा श्रीगणेशा होत आहे.

फडणवीस नाशिकमध्ये सकाळी दाखल होण्याआधीच जलसंपदा व कुंभमेळा मंत्री गिरीश महाजन यांच्या उपस्थितीत अनेक दिग्गज नेत्यांचा भाजपत प्रवेश झाला. यात माजी आमदार आणि काँग्रेसचे जिल्हाध्यक्ष राहिलेले शिरीषकुमार कोतवाल यांचा भाजपत प्रवेश झाला. गेल्या अनेक दिवसांपासून त्यांच्या प्रवेशाच्या चर्चा रंगल्या होत्या. मुख्यमंत्र्यांच्या दौऱ्याच्या पार्श्वभूमीवर तो आज झाला. नाशिक येथील वसंत स्मृती कार्यालयात हा पक्षप्रवेश सोहळा पार पडला.

कोतवाल यांच्यासह नाशिकचे माजी उपमहापौर गुरुमित बग्गा, माजी नगरसेविका नंदिनी बोडके, खंडू बोडके, युवा नेते नरेश पाटील यांच्यासह असंख्य कार्यकर्त्यांनी आज (गुरुवारी) भारतीय जनता पक्षात जलसंपदा मंत्री गिरीश महाजन यांच्या उपस्थितीत प्रवेश केला. त्यामुळे शहर व जिल्ह्यात भाजपची ताकद वाढली असून आगामी जिल्हापरिषद व महानगपालिकेत त्याचा निश्चितच भाजपला फायदा होणार आहे.

शिरीषकुमार कोतवाल यांच्या प्रवेशानंतर मंत्री महाजन म्हणाले, शिरीष भाऊ आजपासून तुम्ही भाजपवासी झाला असून देशाच्या मुख्य राजकीय प्रवाहात आला आहेत. त्यामुळे यापुढे कुठेही जायचे नाही. भाजपमध्ये काँग्रेससारखी भीती नाही आणि स्थिती पण नाही. इथे तुम्हाला काम करायला भरपूर वाव असून तुमच्या सर्व इच्छा आकांक्षा पूर्तीसाठी आम्ही प्रयत्नशील राहू. तुम्ही पक्षाकडे जे काम घेऊन याल ते निश्चितच होईल, याची खात्री बाळगा.

आतापर्यंत तुम्ही काँग्रेस, राष्ट्रवादी काँग्रेस आणि शिवसेनेत राहुन काम केले. आठ वेळा आमदारकीची निवडणूक लढवलेली आहे. भाजपमधील पक्षप्रवेश हा तुमचा शेवटचा पक्षप्रवेश असून, याच्यापुढे कुठेही जायचे नाही आणि जाण्याची वेळही येणार नाही असं महाजन म्हणाले.

दरम्यान आमदार राहुल आहेर यांनीही यावेळी भाष्य केलं. ते म्हणाले, मी आतापर्यंत तीन निवडणुका शिरीष कोतवाल यांच्या विरोधात लढलो, पण कधीही वैयक्तिक पातळीवर टीका केली नाही. आम्ही नेहमीच तत्त्वांवर आधारित राजकारण केले. आज गिरीश भाऊंसोबत शिरीष भाऊही भाजपमध्ये आल्याने आमचा बालेकिल्ला आणखी मजबूत झाला आहे.

या सोहळ्यात कोतवाल यांच्यासह नरेश पाटील, नीलम पाटील, शिवाजी बस्ते, गौरव आग्रवाल , सागर निकम, भागवत जाधव, एकनाथ पगार, शिवाजी कासव, दिनेश जाधव, गुलाब पवार, बाळासाहेब शिंदे यांच्यासह आजी-माजी सरंपच भाजपमध्ये दाखल झाल्याने जिल्ह्यात चांदवड सह नाशिकमध्ये भाजपची ताकद वाढली आहे.