Eknath Khadse Land Case : जमीन खरेदीचे शुक्लकाष्ठ; एकनाथ खडसे आणि कन्येला न्यायालयाचा दिलासा! काय आहे संपूर्ण प्रकरण?

Eknath Khadse and Sharda Khadse case details: राष्ट्रवादी काँग्रेस शरदचंद्र पवार पक्षाचे नेते एकनाथ खडसे आणि राजकीय वाद हे समीकरण कायम आहे. जळगाव जिल्ह्याच्या राजकारणात खडसे आणि त्यांचे विरोधक दोघांचीही राजकीय खडाजंगी सुरू असते. यातील एका प्रकरणाने पुन्हा उचल खाल्ली आहे.

भुसावळ (जळगाव) येथील कथित वतन जमीन खरेदीचा गैरव्यवहार आता पुन्हा पुढे आला आहे. या खटल्यात एकनाथ खडसे यांनी अटक टाळण्यासाठी न्यायालयात धाव घेतली होती. खडसे आणि त्यांची कन्या शारदा खडसे दोघांविरोधात याबाबत तक्रार आहे.

संबंधित मानपुर येथील जमीन खरेदीचे प्रकरण 24 वर्ष जुने आहे. त्यांच्या विरोधकांनी त्याबाबत तक्रार केली होती. त्यामुळे खडसे यांना या प्रकरणात नव्याने अटक होण्याची शक्यता होती. खडसे आणि त्यांची कन्या शारदा खडसे यांनी याबाबत भुसावळ न्यायालयात अटकपूर्व जामीन मागितला होता. त्याची नुकतीच सुनावणी झाली. न्यायाधिश एसटी सूर यांनी या प्रकरणात खडसे यांना दिलासा देत अटकपूर्व जामीन मंजूर केला.

प्रदीर्घ काळ रघडलेल्या या खटल्यात खडसे यांच्या राजकीय विरोधकांनी पुन्हा उचल खाल्ली होती. त्यामुळे खडसे यांच्या अडचणी वाढण्याची शक्यता होती. त्या पार्श्वभूमीवर या निकालाला विशेष महत्त्व दिले जात आहे. न्यायालयाने या संदर्भात महत्त्वाचे निरीक्षण नोंदविले आहे. संबंधित प्रकरण 24 वर्ष जुने आहे.

दीर्घ काळानंतर त्यात तक्रार नोंदविण्यात आली होती. त्यामुळे या प्रकरणातील फसवणूक आणि बनावट गिरीचा आरोप संशयास्पद वाटतो, असे न्यायालयाने म्हटले. संबंधित प्रकरण दिवाणी स्वरूपाचे आणि राजकीय दृष्ट्या प्रेरित होते. त्यामुळे या प्रकरणात ॲट्रॉसिटीचा गुन्हा दाखल करण्याची मागणी खडसे विरोधकांनी केली होती. न्यायालयाने ती फेटाळली.

मानपुर (भुसावळ) येथील संबंधित जमिनीचे हस्तांतरण 2002 मध्ये कायदेशीर प्रक्रिया पूर्ण करून झाले आहे. प्रदीर्घ काळानंतर याबाबतची तक्रार दाखल करण्यात आली होती. खडसे यांच्या विरोधकांनी हे प्रकरण नव्याने उकरून काढले होते. त्यामुळे खडसे यांच्या मागे राजकीय वादाचे शुक्लकाष्ठ कायम आहे.