Shivsena Group News : एकनाथ शिंदे हे `नायक` सिनेमातील मुख्यमंत्र्यांसारखेच लोकप्रिय!

Eknath Shinde is became hero in public : मुख्यमंत्री एकनाथ शिंदेंच्या कामाचा झपाटा पाहून विरोधकांच्या पायाखालची वाळु सरकायला लागली आहे. त्यामुळे विरोधक सभांमध्ये फक्त शिव्याशाप देत आहेत. ते जागेपणी आणि झोपेतील स्वप्नांत देखील फक्त खोके अन् खंजीर एव्हढेच बोलतात असा आरोप खासदार श्रीकांत शिंदे यांनी केला. (Eknath Shinde Group`s Shivsena Nashik office inaugurated by Dr. Shrikant Shinde)

मुख्यमंत्री एकनाथ शिंदे (Eknath Shinde) गटाच्या शिवसेनेच्या (Shivsena) कार्यालयाचे आज खासदार श्रीकांत शिंदे (Dr. Shrikant Shinde) यांच्या हस्ते उद्घाटन झाले. यावेळी ते बोलत होते. मायको सर्कल चौकात हायटेक पध्दतीने उभारलेल्या कार्यालयाच्या उध्दाटनाला ग्रामीण भागातील मोठ्या संख्येने कार्यकर्ते उपस्थित होते.

यावेळी श्रीकांत शिंदे, खासदार हेमंत गोडसे, पालकमंत्री दादा भुसे, आमदार सुहास कांदे, संपर्कनेते भाऊसाहेब चौधरी, जिल्हाध्यक्ष अजय बोरस्ते, शहराध्यक्ष प्रविण तिदमे, सह संर्पकप्रमुख राजू लवटे, बळीराम (मामा) ठाकरे आदीसह मोठ्या संख्येने पदाधिकारी होते.

कार्यालयाच्या उद्घाटनाच्या निमित्ताने मायको सर्कल चौकालगतची ही इमारत सजविण्यात आली होती. भगवे ध्वज, नाशिक ढोलचा गजर अशा वातावरणात उद्घाटन झाले. श्री शिंदे यांनी प्रतिमापूजन केले. तसेच कार्यालयाची पाहणी केली. यावेळी धनुष्यबाण देउन श्री शिंदे यांचा सत्कार झाला. नाशिक ढोल पथकाची प्रात्याक्षिके झाली.

यावेळी खासदार शिंदे म्‍हणाले की, विरोधकांना मतदारांची सहानुभूती मिळवायची असेल, त्यांच्यावर अन्याय झाला हे लोकांना पटवून द्यायचे असेल तर आधी अडीच वर्षाच्या कारकिर्दीत केलेल्या कामाचा लेखाजोखा सादर करावा. गद्दार, खोके, खंजीर अन् कोथळा ही स्क्रीप्ट पुन्हा पुन्हा ऐकून जनतेलाही कंटाळा आला आहे.

ते पुढे म्हणाले, विरोधकांना सध्या फक्त खोकेच माहीत आहेत. त्यामुळे ते दिवसरात्र खोक्यांविषयीच बोलतात. गद्दार आम्ही नसून ते आहेत, कारण त्यांनी हिंदुहृदयसम्राट बाळासाहेब ठाकरेंच्या विचारांशी गद्दारी केली. आम्ही सर्व खरी शिवसेना आहेत. शिवसेनेच्या मार्गावर वाटचाल करीत आहोत.

यावेळी पालकमंत्री दादा भुसे म्हणाले, रोजगार निर्मिती अन् कुंभमेळ्याच्या तयारीचा आराखडा तयार आहे. त्यातून विशेष पॅकेज नाशिकला मिळणार आहे. सामान्य माणुस आणि शेतकरी हा यंदाच्या अर्थसंकल्पाच्या केंद्रस्थानी असून नियमित कर्जफेड करणाऱ्या शेतकऱ्यांना सुट देण्याची घोषणा अडीच वर्षापूर्वी झाली. मात्र प्रामाणिक शेतकऱ्यांच्या खात्यावर अडीच हजार कोटी देण्याचे काम शिंदे सरकारने केले.

शेतकऱ्यांच्या कांद्याला साडे तीनशे अनुदान राज्य सरकारने दिले. ठाणे जिल्ह्यानंतर एकनाथ शिंदे यांचे प्रेम नाशिकवर आहे. ज्याप्रमाणे कल्याण डोंबिवली, ठाणे, मुंबई बदलतेय त्याप्रमाणे नाशिक बदलणार आहे. असा दावा त्यांनी केला.

आमदार सुहास कांदे यांनी कार्यकर्त्यांना गावागावात शिवसेनेच्या शाखा उघडण्याचे आवाहन केले. अभिनेता अनिल कपूर यांच्या `नायक` चित्रपटात एक दिवसात मुख्यमंत्री काय करतो हे दाखविले गेले. पण राज्यात मात्र मुख्यमंत्री एकनाथ शिंदे यांच्या कारकिर्दीत तसा रोजच कामांचा धडाका सुरु आहे.