Nashik News, 20 Jan : नाशिक महापालिका निवडणुकीत उपमुख्यमंत्री एकनाथ शिंदेंच्या शिवसेनेला अपेक्षित यश मिळालं नाही. त्याचा फटका पक्षाच्या आगामी राजकारणावर होणार आहे. त्यामुळे पक्षाने भविष्यातील रणनीती ठरविण्यासाठी चर्चा केली. शिक्षण मंत्री दादा भुसे यांनी नवनिर्वाचित नगरसेवकांची बैठक घेतली.
यावेळी महापालिका निवडणुकीचा आढावा घेण्यात आला. पक्षाला अपेक्षित यश मिळाले नाही, यावर त्यांनी आपली प्रतिक्रिया व्यक्त केली. एकनाथ शिंदे यांना नाशिक महापालिकेच्या निवडणुकीत मोठ्या अपेक्षा होत्या. त्यासाठी पक्षाने शेवटपर्यंत भाजपशी युती करण्याचा प्रयत्न केला. अपयश आल्यावर राष्ट्रवादी काँग्रेस अजित पवार पक्षाशी युती केली होती.
शिवसेना आणि राष्ट्रवादी काँग्रेसला महापालिकेत अपेक्षित यश मिळालेले नाही. शिवसेनेला पन्नासहून अधिक जागा मिळतील असा अंदाज होता. मात्र पक्षाचे 26 आणि राष्ट्रवादी काँग्रेसचे चार असे 30 नगरसेवक निवडून आलेत.
या संदर्भात पराभवाची सर्व जबाबदारी शिक्षणमंत्री भुसेंनी स्वीकारली. अपयशाला मी जबाबदार असल्याचे सांगत यापुढे अधिक प्रभावी कामकाजावर लक्ष केंद्रित करणार आहे. त्यासाठी प्रत्येक प्रभागात पक्षाचे कार्यालय उघडण्यात येईल.
महापालिकेत शिवसेना विरोधात बसणार का? याची नवनिर्वाचित नगरसेवकांना उत्सुकता आहे. मात्र याबाबत दादा भुसेंनी पक्षप्रमुख निर्णय घेतील या शब्दात प्रश्न निकाली काढला. भाजपला 72 जागा मिळाल्याने ते स्वबळावर सत्तेत आलेत. महापालिकेतील निवडणूक निकालाचा परिणाम शिवसेना शिंदे पक्षाच्या आगामी राजकारणावर होणार आहे.
महापालिका आपल्या ताब्यात असावी यासाठी शिक्षण मंत्री भुसे यांनी आटोकाट प्रयत्न केले होते. त्यासाठी निवडणुकीत उमेदवारांना भरपूर रसद पुरविण्यात आली होती. मात्र अपेक्षित यश मिळाले नाही.
बहुतांशी नगरसेवक त्र्यंबकेश्वर पॅटर्न नाशिकला प्रत्यक्षात येईल या अपेक्षेत होते. त्र्यंबकेश्वरला भाजपचा बालेकिल्ल्यातच अनपेक्षित पराभव झाला होता. त्यामुळे नाशिकमध्ये देखील भाजपला फटका बसेल अशी चर्चा होती. मात्र शिवसेनेची ही अपेक्षा मतदारांनी फोल ठरवली.
निवडणूक निकाल जाहीर झाल्याने आता स्वीकृत नगरसेवक आणि महापौरपदाच्या हालचाली सुरू झाल्या आहेत. महापालिका निवडणुकीप्रमाणे स्वीकृत नगरसेवक पदासाठी देखील घोडेबाजार होण्याची चिन्हे आहेत. त्यामुळे सावध झालेल्या दादा भुसे यांनी कोणताही घोडेबाजार होणार नाही असे ठामपणे सांगितले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.