Ahmednagar News : श्रीगोंदा बाजार समितीच्या सभापतीपदासाठी संचालकांचे गुडघ्याला बाशिंग; अनेकांनी लावली फिल्डींग?

Political News : राज्यातील अनेक कृषी उत्पन्न बाजार समितीच्या निवडणुका काही दिवसांपूर्वी पार पडल्या. त्यानंतर बाजार समित्यांचे निकालही समोर आले. मात्र, आता बाजार समितीच्या सभापती व उपसभापती पदासाठी अनेकांची रस्सीखेच सुरू झाली आहे.

अनेक संचालकांनी सभापती व उपसभापती पदासाठी फिल्डींग लावल्याची चर्चा आहे. अहमदनगर जिल्ह्यातील श्रीगोंदा बाजार समितीच्या सभापती आणि उपसभापतीपदाची निवड गुरुवारी (दि.18 मे) होण्याची शक्यता आहे. त्यामुळे सभापती आणि उपसभापतीपदासाठी अनेकांची रस्सीखेच सुरू आहे.

श्रीगोंदा बाजार समितीच्या सभापतीपदासाठी राहुल जगताप यांच्या गटाकडून साजन पाचपुते आणि अतुल लोखंडे यांचे नाव चर्चेत आहे. सभापतीपदासाठी जगताप गटाकडून जोरदार हालचाली सुरू आहेत. त्यामुळे सभापतीपदाची माळ अखेर कुणाच्या गळ्यात पडणार? याकडे सर्वांचे लक्ष लागले आहे.

श्रीगोंदा बाजार समिती निवडणुकीत राहुल जगताप यांच्या गटाने 18 पैकी 11 जागा जिंकल्या. तर पाचपुते आणि नागवडे गटाने 7 जागा जिंकल्या. आता सभापतीपदासाठी अतुल लोखंडे आणि साजन पाचपुते यांचे नाव आघाडीवर आहे. असे असले तरी सभापतीपदासाठी अनेकांनी गुडघ्याला बाशिंग बांधले आहे.

(Edited By- Ganesh Thombare)