Girish Mahajan : आता ज्यांचे तिकीट कापले जाईल, त्यांना पुढे आमदारकी मिळू शकते ; गिरीश महाजनांकडून नाराज इच्छुकांची समजूत

Jalgaon Politics : राज्यभरातील महापालिका निवडणुकांचा बिगुल वाजला आहे. इच्छुक उमेदवारांकडून उमेदवारी अर्ज भरले जात आहेत. अशात भाजपकडे इच्छुकांची संख्या अधिक असल्याने अनेकांचे तिकीट कापले जाऊ शकते. त्यातून बंडखोरी होण्याची देखील शक्यता असते. त्याच भीतीतून भाजपच्या संकटमोचकांकडून नाराज इच्छुकांची नाराजी दूर करण्याचा प्रयत्न केला जात आहे.

जळगाव महापालिका निवडणुकीच्या पार्श्वभूमीवर नुकतीच इच्छुक उमेदवार व पदाधिकाऱ्यांची बैठक झाली. या बैठकीत जलसंपदा मंत्री गिरीश महाजन म्हणाले, महापालिका निवडणुकीत ज्यांचे तिकीट कापले जाईल, त्यांना पुढे बढती दिली जाईल. नगरसेवक नाही, तर आमदारकी तुम्हाला मिळू शकते, असे सांगत नाराज इच्छुकांची नाराजी दूर करण्याचा प्रयत्न त्यांनी केला.

मंत्री महाजन पुढे म्हणाले की, ज्यांचे तिकीट आता कापले जाणार आहे त्यांचा पुढे आमदारकी म्हणजे विधानपरिषदेवर, शिक्षक पदवीधर मतदारसंघ, विविध महामंडळावर तुमचा विचार केला जाईल. यामुळे नाराज होऊ नका अशी समजूत त्यांनी काढली. यावेळी आमदार मंगेश चव्हाण, आमदार सुरेश भोळे, डॉ. राधेश्‍याम चौधरी, माजी महापौर नितीन लढ्ढा आदी या वेळी उपस्थित होते.

महाजन म्हणाले भारतीय जनता पार्टीने जळगाव शहरात तीन वेगवेगळे सर्व्हेक्षण केले आहे. त्या सर्व्हेक्षणाच्या आधारे उमेदवार निश्‍चित केले जाणार आहेत. जे निष्ठावंत आहेत, जे सक्षम आहेत, प्रामाणिकपणे काम करत आहेत त्यांचा विचार निश्‍चित केला जाईल. खासदार स्मिता वाघ यांचे तिकीट काही वर्षांपूर्वी कापले गेले होते. मात्र, नंतर त्यांना पुन्हा संधी दिली गेली. यामुळे ज्यांचे तिकीट आता कापले जाईल, त्यांनी नाराज होऊ नये. त्यांना पुढे नवीन संधी दिल्या जातील असा दाखलाही त्यांनी दिला.

महाजन पुढे म्हणाले, मागच्यावेळी महापालिकेत आपण ७५ जागा लढविल्या होत्या. त्यापैकी ५७ जागा निवडून आल्या. यंदाही आपल्याला असाच विक्रम करायचा आहे. आपल्याकडे सुमारे सहाशे इच्छुकांचे अर्ज आले आहेत अशी माहिती त्यांनी दिली.

आपली महायुती असून युती धर्म पाळावा लागणार आहे. त्यामुळे त्यांना काही जागा द्याव्या लागणार आहे. त्यामुळे ज्यांचे तिकीट कापले जाईल, त्यांनी नाराज न होता पक्षाचे प्रामाणिकपणे काम करावे. जोपर्यंत मतदार मतदान यंत्रापर्यंत येऊन आपल्याला मतदान करणार नाही, तोपर्यंत स्वस्थ बसू नका, असे आवाहन त्यांनी केले.

दरम्यान या बैठकीनंतर भाजपमधील निवडणुकीसाठी इच्छुक असलेल्या निष्ठावंत उमेदवारांनी मंत्री महाजन यांची स्वतंत्र भेट घेतली. त्यांनी आम्ही जुने निष्ठावंत आहोत. तरी अजून आम्हाला तिकीट नाकारले जात आहे. नवीन येणाऱ्यांना तिकीट दिले जाते. डावलले जात असल्याची नाराजी त्यांनी व्यक्त केली.