Devyani Pharande : देवयानी फरांदेंच्या डोळ्यात आलं पाणी, गिरीश महाजनांपुढे झाल्या हतबल..

Nashik Politics : नाशिक महापालिका निवडणुकीच्या अनुषंगाने मंत्री गिरीश महाजन यांच्या नेतृत्वात आज भाजपमध्ये मोठा पक्षप्रवेश सोहळा पार पडला. शिवसेना उद्धव ठाकरे पक्ष व मनसेच्या अनेक दिग्गज नेत्यांनी आज भाजपची वाट धरली. यातील काही जणाच्या पक्षप्रवेशाला भाजपच्या निवडणूक प्रमुख व आमदार देवयानी फरांदे यांचा विरोध होता. परंतु फरांदे यांचा विरोध झुगारुन मंत्री महाजन यांनी त्यांना पक्षात प्रवेश दिला

शिवसेना उद्धव बाळासाहेब ठाकरे पक्षाचे माजी महापौर विनायक पांडे, यतीन वाघ, कॉंग्रेसचे शाहू खैरे व मनसेचे दिनकर पाटील यांनी आपल्या समर्थकांसह भाजपमध्ये प्रवेश केला. यातील माजी महापौर विनायक पांडे, यतीन वाघ व कॉंग्रेसचे शाहू खैरे यांच्या पक्षप्रवेशाला देवयानी फरांदे व त्यांच्या समर्थकांनी विरोध केला. भाजप कार्यालयाबाहेर फरांदे समर्थकांनी मंत्री गिरीश महाजनांना घेराव घातला. महाजनांसमोर फरांदे समर्थकांनी घोषणाबाजी करत या प्रवेश सोहळ्याला विरोध दर्शवला.

परंतु महाजन यांनी आमदार देवयानी फरांदे व त्यांच्या समर्थकांचा विरोध झुगारुन या सर्वांना पक्षात अधिकृत प्रवेश दिला. त्यामुळे आमदार देवयानी फरांदे दुखावल्याचे पाहायला मिळाली. माध्यमांशी बोलताना त्या भावूक झाल्या होत्या. त्यांच्या डोळ्यात पाणी आलेलं दिसलं.

देवयानी फरांदे म्हणाल्या, मध्य विधानसभेची आमदार म्हणून माझं मत होतं की, प्रभागात एक अतिशय सक्षम उमेदवार बबलू शेलार यांचा भाजप प्रवेश झाला होता. आणि आमचे उर्वरित जे सगळे उमेदवार होते त्यांना व पक्षाच्या कार्यकर्त्यांना घेऊन.. एक बबलू शेलार आणि पक्षाचे तीन असे मिळून पॅनल केला असता तर शंभर टक्के ते निवडले जाणार होते असं लोकप्रतिनिधी या नात्याने माझं मत होतं. बाकी माझा कुणाच्या पक्षप्रवेशाला विरोध करण्याचे कारण नाही.

गेल्या चाळीस वर्षात मी स्वत:साठी कधीही जाहीर भूमिका घेतली नाही. पक्षाची मी निष्ठावन कार्यकर्तेी आहे. पक्षाच्या निष्ठावान पदाधिकारी व कार्यकर्त्यांना पाठबळ देण्यासाठी मी सकाळी सोशल मीडीयावर या पक्षप्रवेशाला माझा विरोध आहे अशी पोस्ट टाकली. दरम्यान हे बोलताना देवयानी फरांदे यांना गहिवरुन आलं होतं. त्या म्हणाल्या मी पक्षाची सर्वसामन्य कार्यकर्ती आहे. माझ्या डोळ्यासमोर जर कार्यकर्त्यांचा बळी दिला जात असेल तर हे मला बरोबर वाटलं नाही.

जे आज पक्षात आले आहे त्यांचे पक्षातील वरिष्ठ पदाधिकारी म्हणून स्वागत करते पण जे काही आज घडलं ते मला काही आवडलेलं नाही. मला कुणी कोंडीत पकडायचं असेल त्यांनी पकडावं मी कुणाला घाबरत नाही. तसेच मी गिरीश महाजन साहेबांवर नाराज नाही. त्यांना चुकीच्या पद्दतीने ब्रीप केलं गेलं आहे. काही दलाल आहेत त्यांना वाटतं आपल्याच घरात सगळी तिकीटं मिळावी या स्वार्थातून हे राजकारण झालेलं असल्याचं त्या म्हणाल्या.