Nashik Politics : दोन्ही ठाकरे बंधू एकत्र आल्याने मविआ'लाच तडा.. सेना-मनसे एकीकडे तर कॉंग्रेस -राष्ट्रवादी दुसरीकडे

Nashik Politics : भाजपला सत्तेपासून दूर ठेवण्यासाठी दोन्ही ठाकरे बंधूंचे मनोमिलन झाले. शिवसेना ठाकरे गट व मनसे एकत्र आली. पण त्याचा परिणाम आता मविआच्या जागावाटपावर होताना दिसत आहे. त्याचा परिणाम म्हणून नाशिकमध्ये मविआमध्ये फाटाफूटीची शक्यता निर्माण झाली आहे. सेना-मनसे एकीकडे तर कॉंग्रेस-राष्ट्रवादी दुसरीकडे असे चित्र निर्माण झाले आहे.

जागा वाटपावरुन महाविकास आघाडीतही मतभेद निर्माण झाल्याचे चित्र आहे. नाशिकमध्ये शिवसेना उद्धव बाळासाहेब ठाकरे पक्ष काँग्रेस व राष्ट्रवादी काँग्रेस शरदचंद्र पवार पक्षापेक्षा मनसेला जास्त जागा देण्याच्या तयारीत आहे. त्यातूनच महाविकास आाघाडीत फाटाफूटीची शक्यता निर्माण झाली आहे.

काँग्रेस व राष्ट्रवादी काँग्रेस शरदचंद्र पवार पक्ष यांना प्रत्येकी सातपेक्षा अधिक जागा देण्यास शिवसेना उद्धव बाळासाहेब ठाकरे पक्ष व मनसेने ठाम नकार दिल्याने संतप्त झालेल्या दोन्ही काँग्रेस व राष्ट्रवादी कॉंग्रेस शरदचंद्र पवार पक्षांच्या नेत्यांनी बैठक अर्धवट सोडत आघाडीतून बाहेर पडण्याचा निर्णय घेतला. दरम्यान, माकप व वंचित बहुजन आघाडीला सोबत घेऊन ‘नवी विकास आघाडी’ स्थापन करण्याचा इशाराही दिला आहे.

महापालिका निवडणुकीसाठी उमेदवारी अर्ज दाखल करण्याची प्रक्रिया सुरु आहे. निवडणूक जवळ आली आहे. असे असताना भाजपला आव्हान देण्याची तयारी करु पाहणारी महाविकास आघाडी जागा वाटपावरुन दुगंभगल्याचे चित्र आहे.

शालीमारमधील बैठक वादातच संपली

शिवसेना उद्धव बाळासाहेब ठाकरे पक्ष , मनसे, काँग्रेस, राष्ट्रवादी शरदचंद्र पवार पक्ष, वंचित व रासप यांची शनिवारी (ता. २७) शालीमार येथील शिवसेना कार्यालयात बैठक झाली. शिवसेना उद्धव बाळासाहेब ठाकरे पक्षाकडून उपनेते दत्ता गायकवाड, माजी महापौर वसंत गीते, जिल्हाप्रमुख डी. जी. सूर्यवंशी, खासदार राजाभाऊ वाजे, मनसेकडून प्रदेश उपाध्यक्ष सलीम शेख, शहराध्यक्ष सुदाम कोंबडे, राष्ट्रवादीकडून शहराध्यक्ष गजानन शेलार, काँग्रेसकडून शहराध्यक्ष अ‍ॅड. आकाश छाजेड आदी उपस्थित होते. प्रभागनिहाय जागांवर सविस्तर चर्चा झाली.

चर्चा अर्धवट सोडून बैठक सोडली

शिवसेना उद्धव बाळासाहेब ठाकरे पक्ष व मनसेकडून काँग्रेस आणि राष्ट्रवादीसमोर प्रत्येकी सात जागांचा प्रस्ताव ठेवण्यात आला. मात्र ते मान्य न झाल्याने संतप्त झालेल्या काँग्रेस व राष्ट्रवादीच्या नेत्यांनी जागावाटपाची चर्चा अर्धवट सोडून बैठक सोडली. परिणामी महाविकास आघाडीची चर्चा थांबली.

तीन प्रभागांवरुन वाद

महाविकास आघाडीच्या जागावाटपात तीन प्रभागांवरुन वाद असल्याचे दिसले. प्रभाग क्रमांक १, ६ आणि १० या प्रभागांवर शिवसेना उद्धव बाळासाहेब ठाकरे पक्ष, काँग्रेस व राष्ट्रवादी शरदचंद्र पवार पक्ष यांचे एकमत झाले नाही. शिवसेना उद्धव बाळासाहेब ठाकरे पक्ष व मनसेने 'मैत्रीपूर्ण लढत' करण्याचा प्रस्ताव मांडला. मात्र, मैत्रीपूर्ण लढतच करायची असेल तर आघाडी कशासाठी?’ असा सवाल करत काँग्रेस व राष्ट्रवादी शरदचंद्र पवार पक्षातील नेत्यांनी चर्चा थांबवली व बैठकीतून बाहेर पडले.

तर जागा उबाठा व मनसेमध्ये वाटून घेऊ

दरम्यान वाद असलेल्या जागांवर तोडगा काढण्यासाठी शिवसेना उद्धव बाळासाहेब ठाकरे पक्ष व मनसेकडून काँग्रेस व राष्ट्रवादी शरदचंद्र पवार पक्षाला एक दिवसाची मुदत देण्यात आली आहे. या कालावधीत प्रतिसाद न मिळाल्यास राष्ट्रवादीला देण्यात येणाऱ्या जागा शिवसेना उद्धव बाळासाहेब ठाकरे पक्ष व मनसेमध्ये वाटून घेतल्या जाणार असल्याचा स्पष्ट इशाराही देण्यात आला.