Jalgaon Mayor : जळगाव महापौर पदावरून नवा पेच, मराठा की लेवा पाटील? गिरीश महाजन घेणार निर्णय!

Jalgaon Mayor News : जळगाव महापालिकेच्या महापौरपदी कोणाला संधी देणार हा निर्णय दोन दिवसात होण्याची शक्यता आहे. जलसंपदा मंत्री गिरीश महाजन आणि महापालिका निवडणुकीसाठी नियुक्त केलेली नेत्यांची कोअर कमिटी हा निर्णय घेईल. येत्या दोन दिवसात महापौर पदाचे नाव निश्चित होण्याचे चिन्ह आहेत.

महापालिका निवडणुकीत भाजपने १०० टक्के तर शिवसेना एकनाथ शिंदे पक्षाचा ९९ टक्के स्ट्राईक रेट होता. भाजपचे ४६, शिवसेनेचे २२ आणि राष्ट्रवादी काँग्रेस अजित पवार पक्षाचा एक असे महायुतीचे ७५ पैकी ६९ नगरसेवक विजयी झाले.

संख्याबळ विचारात घेता महापौरपद भाजपकडे राहील हे स्पष्ट झाले आहे. उपमहापौर पद शिवसेना एकनाथ शिंदे पक्षाला मिळणार आहे. त्या दृष्टीने महायुतीचे घटक पक्ष उमेदवार ठरविण्याच्या कामाला लागले आहेत.

ओबीसी महिला प्रवर्गासाठी महापौर पद राखीव आहे. भाजपकडे उज्वला बेंडाळे, दीपमाला काळे आणि वैशाली पाटील या तीन महिला महापौर पदासाठी चर्चेत आहेत. मात्र उमेदवारी निश्चित करताना कोणते धोरण स्वीकारले जाते याकडे लक्ष आहे.

महापौर पदाची संधी कोणत्या उमेदवाराला द्यावी यावरून भाजपामध्ये नवा पेच आहे. जळगाव महापालिका आणि शहराचे राजकारण यावर लेवा पाटील समाजाचे वर्चस्व आहे. त्या खालोखाल मराठा समाज शहराच्या भाजपच्या राजकारणात सक्रिय आहे.

त्यामुळे महापौर पदाची संधी मराठा समाजाला की लेवा पाटील समाजाला असा नवा पेच आहे. दोन्ही समाजाच्या नेत्यांकडून या संदर्भात स्वतंत्रपणे नेत्यांच्या गाठीभेटी घेतल्या जात आहेत. त्यामुळे सामाजिक स्तरावर राजकारणाचा विचार करून महापौर पदाचा उमेदवार दिला जाण्याची दाट शक्यता आहे.

निवडणुकीच्या आधी नावाची घोषणा

जलसंपदा मंत्री गिरीश महाजन याबाबत महत्त्वाची भूमिका बजावतील. भाजपने महापालिका निवडणुकीसाठी प्रमुख नेत्यांची समिती नियुक्त केली होती. या समिती सोबत मंत्री महाजन चर्चा करणार आहे. येत्या दोन दिवसात महापौर कोण हे नाव निश्चित होऊ शकते. नाव निश्चित झाले तरीही त्याची घोषणा मात्र महापौर पदाच्या निवडणुकीच्या काही तास आधी केले जाणार असल्याचे सूत्रांनी सांगितले.