राज्यपाल भगतसिंह कोश्यारींकडूनही ‘जय श्रीराम’चा घोष

नाशिक : महाराष्ट चेंबर ऑफ कॉमर्सच्या (MCCIA) कार्यक्रमासाठी शहरात आलेल्या राज्यपाल भगतसिंह कोश्‍यारी (Bhagatsingh Koshiyari) यांनी रविवारी पालकमंत्री छगन भुजबळ (Chhagan Bhujbal) यांच्यासह श्री काळाराम मंदिरास भेट देऊन श्रीरामाचे (Shreeram) दर्शन घेतले. राज्यपालांनी विश्‍वस्तांच्या उपस्थितीत ‘जय श्रीराम’चा नाराही दिला. त्यानंतर राज्यपालांनी विश्‍वस्त मंडळाकडून मंदिराचा इतिहासही समजावून घेतला.

नाशिक दौऱ्यावर आलेल्या राज्यपाल कोश्‍यारी यांनी आज सकाळी साडेसातला श्रीराम मंदिरात प्रवेश केला. त्या वेळी पालकमंत्री भुजबळ, आमदार ॲड. राहुल ढिकले आदींसह विश्‍वस्त उपस्थित होते. विश्‍वस्तांनी राज्यपाल, पालकमंत्र्यांचे स्वागत केल्यावर राज्यपालांनी जय श्रीरामच्या जयघोषात श्रीरामाचे दर्शन घेतले.

दर्शनानंतर विश्‍वस्तांच्या हस्ते राज्यपाल व पालकमंत्र्यांचा छोटेखानी सत्कारही करण्यात आला. त्यानंतर राज्यपालांनी मंदिराच्या बांधकामाविषयी विश्‍वस्तांकडून माहितीही जाणून घेतली. विश्‍वस्त मंदार जानोरकर, डॉ. एकनाथ कुलकर्णी, धनंजय पुजारी, शांताराम अवसरे, ॲड. दिलीप कैचे, ॲड. दत्तप्रसाद निकम, मंगेश पुजारी आदी उपस्थित होते.

विकासनिधी मिळवून देऊ

राज्यपालांनी श्रीरामाचे दर्शन घेतल्यानंतर विश्‍वस्त मंदार जानोरकर, डॉ. एकनाथ कुलकर्णी आदींच्या उपस्थितीत राज्यपालांना मंदिर विकास आराखडा मंजूर व्हावा, देवस्थानला पर्याप्त निधी उपलब्ध व्हावा, अशा मागणीचे निवेदन देण्यात आल्याचे जानोरकर यांनी सांगितले. या वेळी राज्यपालांनीही सकारात्मकता दाखवत केंद्र व राज्य सरकारच्या निधीतून मंदिराच्या विकासासाठी निधी मिळवून देण्याचे आश्‍वासन उपस्थित विश्‍वस्त मंडळाला दिले.

प्रभू श्रीराम हे संपूर्ण भारताचे दैवत आणि आदर्श आहेत. त्यांच्या त्याग भावनेने आज मर्यादा पुरुषोत्तम म्हणून ते संपूर्ण विश्वाला व्यापून आहेत, असे राज्यपाल कोश्यारी यांनी यावेळी सांगितले.

---