Gulabrao Patil: शिंदेसेना ही 'लोफरांची'? राऊतांच्या आरोपावर गुलाबराव भडकले; म्हणाले, 'कावळ्याचं बसणं अन् फांदीचं तुटणं...'

देविदास वाणी

Jalgaon News: शिवसेना उद्धव ठाकरे पक्षाचे खासदार संजय राऊत यांनी लिहिलेल्या ‘नरकातला स्वर्ग’ या पुस्तकात त्यांनी अनेक दावे केले आहेत. त्यावरुन आता राजकीय चिखलफेक सुरु झाली आहे.

खासदार राऊतांनी शिंदेंची शिवसेना ‘लोफरांची’ आहे, असा आरोप केला आहे? त्यावर जळगाव जिल्ह्याचे पालकमंत्री गुलाबराव पाटील म्हणाले, "संजय राऊत महालोफर आहे. कावळ्याचे बसणं आणि फांदीचं तुटणं अशातचा हा प्रकार आहे. ते ठाकरे गटात एकटेच असल्याने तेच बोलत असतात.,"

राऊतांनी लिहिलेल्या ‘नरकातला स्वर्ग’ या पुस्तकात गुजरातचे तत्कालीन मुख्यमंत्री नरेंद्र मोदी आणि तत्कालीन गृहराज्यमंत्री अमित शाह या दोघांना शिवसेना प्रमुख बाळासाहेब ठाकरे यांनी मदत केली, असल्याचे म्हटलं आहे. आता यावरुन राजकीय वर्तुळात आरोप-प्रत्यारोप सुरू झाले आहेत. मोदी आणि शाह यांना बाळासाहेबांनी केलेल्या मदतीचा किस्सा राऊतांनी पुस्तकात सांगितला आहे.

नरेंद मोदी गुजरात दंगलीतील संशयित असताना त्यांना बाळासाहेब ठाकरे यांनी त्यातून बाहेर काढले होते. अमित शाह संशयित आरोपी असताना राष्ट्रवादी कॉग्रेस शरदचंद्र पवार पक्षाचे अध्यक्ष शरद पवार यांनी त्यांना बाहेर काढले होते. भाजपला बाळासाहेब आणि पवारांनी मदत केली असल्यावरही शिवसेना, राष्ट्रवादी कॉग्रेस शरदचंद्र पवार पक्षाशी उपकाराची भाषा करण्याऐवजी दोघांचे पक्ष फोडले आहे, असा दावा राऊत यांनी केला आहे.

याबाबत पालकमंत्री पाटील यांना विचारले असता, ते म्हणाले की बाळासाहेब आणि नरेंद्र मोदी यांचे चांगले मैत्रीपूर्ण संबंध होते. त्यांच्याविषयी बोलणे योग्य नाही. राऊत त्यावेळी संपादक होते, मध्यस्थी नव्हते. त्यांना भाजप-शिवसेनेमध्ये काय चालले आहे, याची कल्पना नव्हती. बाळासाहेबांची शिवसेना संपलेली नाही, आम्ही कार्यकर्ते आजही जिवंत आहोत, पवारांविषयी मला माहीत नाही,असे गुलाबराव पाटील म्हणाले.