Gulabrao Patil : तुम्ही तुमची मध्यस्थी मातोश्रीवर करा, इकडे नाही ; 'बे लाज, बे शरम'... गुलाबरांवांनी राऊतांचा पाणउताराच केला

Maharashtra Politics : भारत पाकिस्तान युद्धा दरम्यान युद्धविराम घडवून आणण्यासाठी अमेरिकेचे राष्ट्राध्यक्ष डोनाल्ड ट्रम्प यांनी मध्यस्थी केली. त्यावर शिवसेना उबाठा गटाचे खासदार संजय राऊत यांनी ट्रम्प यांच्या मध्यस्थीवर प्रश्नचिन्ह उपस्थित केले. आमची माणसं मारली गेली, आमच्या २६ महिलांचा सिंदूर पुसला, मग ऑपरेशन सिंदूर पूर्ण झाल्याशिवाय ट्रम्प हे कोणत्या अधिकाराने मध्यस्थी करत आहेत, त्यांचा काय संबंध असा सवाल संजय राऊत यांनी उपस्थित केला होता.

पाकिस्तानने केलेल्या शस्त्र संधीच्या उल्लंघनानंतर पंतप्रधान नरेंद्र मोदी यांनी राजीनामा द्यावा, अशी मागणी खासदार संजय राऊत यांनी केली होती. या वक्तव्यावरून मंत्री गुलाबराव पाटील यांनी संजय राऊत यांचा चांगलाच समाचार घेतला आहे. ते म्हणाले, बेलाज बेशरम जो माणूस असतो ना तोच असल्या गोष्टी करतो. आपण कोण बोलत आहोत. कोणावर बोलत आहोत. तुम्ही साधे नगरसेवक तरी झालात का? आमदारांच्या मतावर खासदार झाला आहात.

देशावर आज काय वेळ आहे आणि तु्म्ही काय बोलत आहात. राजीनामा मागण्याची ही वेळ आहे का? आज देशाच्या बाजूने उभे राहण्याची वेळ आहे. अशा पद्धतीने आपल्याच घरातील लोक जर पंतप्रधांवर टीका करत असतील तर देशाचे काय होईल असं पाटील म्हणाले.

ट्रम्प यांना भारत व पाकिस्तान मध्ये मध्यस्ती करण्याचा अधिकार कुणी दिला. त्यांच्या मध्यस्तीने युद्ध थांबवले हे भारतासारख्या देशाला आणि पंतप्रधानाला हे शोभत नाही असं संजय राऊत म्हणाले होते. त्यावर बोलताना गुलाबराव पाटील म्हणाले, ट्रम्प यांच्या मध्यस्तीवर विचारणारे तुम्ही कोण आलेत. तुम्ही तुमची मध्यस्ती मातोश्रीवर करा, इकडे करु नका अशा भाषेत मंत्री गुलाबराव पाटील यांनी संजय राऊत यांना ठणकावलं.

दरम्यान राज्यात शरद पवार आणि अजित पवार एकत्र येण्याच्या चर्चा सुरु आहेत. त्याविषयी विचारले असता गुलाबराव पाटील म्हणाले, राजकारणात काहीही होऊ शकते. निवडणुका आटोपल्या की लोक दहा दिवसात पक्षांतर करत आहे. त्यामुळे शरद पवार आणि अजित पवार एकत्र आले तर आश्चार्य वाटू नये.