Rohit Pawar : मुख्यमंत्री शिंदेंसाहेब, अमित शाह यांची भाषा समजावून घ्या; रोहित पवारांनी सल्ला देत डिवचलं

Ahilyanagar News : भाजप नेते केंद्रीय मंत्री अमित शाह यांनी विधानसभा निवडणुकीत शिवसेना नेते मुख्यमंत्री एकनाथ शिंदे यांना भाजपने केलेल्या त्यागाची आठवण करून दिली.

यावरून आता विरोधकांनी एकनाथ शिंदे यांना डिवचायला सुरवात केली आहे. राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार यांनी देखील टायमिंग साधलं आहे.

भाजप (BJP) नेते अमित शाह यांनी एकनाथ शिंदे यांना मुख्यमंत्री करत भाजप केलेल्या त्याग मोठा होता. जागा वाटपात याचा विचार करावा, असं म्हटलं आहे. यावरून राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार यांनी चांगलीच फिरकी घेतली. भाजप नेते अमित शाह यांना एकप्रकारे एकनाथ शिंदे यांना संधी दिली, ती शेवटची संधी आहे. पुढचे पाच वर्ष त्यांना जे वाटतंय, आमचे सरकार येणार आहे, ते येणार नाही. एकनाथ शिंदे यांना आम्ही पुन्हा संधी देणार नाही. खूप त्याग केलेला आहे, असा टोला रोहित पवार यांनी लगावला.

रोहित पवार पुढे म्हणाले, "मुख्यमंत्री एकनाथ शिंदे यांनी देखील या गोष्टी समजून घ्यायला पाहिजे. 2029 ला आम्ही स्वबळाचं सरकार आणू आणि मुख्यमंत्री आमचाच असेल, तो एक सिग्नल होता. आता एकनाथ शिंदेसाहेब (Eknath Shinde) काय करतात हे पाहावे लागेल". मात्र येत्या काळात तिघांना विरोधी पक्ष नेता कोण? याच्यासाठी भांडवे लागेल, अशी परिस्थिती होईल, असे म्हणत आमदार रोहित पवार यांनी एकनाथ शिंदे यांना डिवचलं.

'तुतारी' 'हातात' घेऊन 'मशाली'चा विजय निश्चित

निवडणूक आयोगाने पिपाणी हे चिन्हं हटवण्यात विरोध दर्शवला आहे. 'पिपाणी' हे चिन्हं पक्ष चिन्हांमध्ये राहणार आहे. यावरही आमदार रोहित पवार यांनी प्रतिक्रिया दिली. पवार म्हणाले, "लोकसभा निवडणुकीत लोकांना कळले आहे की, 'तुतारी' कुठली आणि 'पिपाणी' कुठली. तरीही विरोधकांना याचा उपयोग विधानसभा निवडणुकीत मत विभागणी करायची असेल". मात्र लोक आता शहाणे झाले आहेत. त्यामुळे 'तुतारी' 'हातात' घेऊन 'मशाली'चा विजय करायचा आहे, अशी प्रतिक्रिया आमदार रोहित पवार यांनी दिली.