Shalarth ID scam : जळगाव जिल्ह्यातील ६५० शिक्षक व शिक्षकेतर कर्मचाऱ्यांचे वेतन थांबवण्याचे आदेश, बोगस मान्यता प्रकरणात कारवाई

Jalgaon Teacher Scam : बोगस वैयक्तिक मान्यता आणि शालार्थ आयडी घोटाळ्यातून शासनाची तब्बल १६० कोटी रुपयांची फसवणूक करण्यात आली आहे. जळगाव जिल्हा या घोटाळ्याचे केंद्र असून सर्वाधिक संशयित तेथील आहेत. आता या घोटाळ्याप्रकरणी मोठी कारवाई करण्यात आली असून जिल्ह्यातील माध्यमिक विभागातील सुमारे ६५० शिक्षक आणि शिक्षकेतर कर्मचाऱ्यांचे वेतन थांबविण्याचे आदेश प्राप्त झाले आहेत.

शिक्षण विभागाकडून संबंधित शिक्षक व संस्थाचालकांना सोमवार, (दि. २६) ऑक्टोबरपासून आदेशांचे वितरण केले जाणार आहे. पहिल्या टप्प्यात १३२ कर्मचाऱ्यांच्या मान्यता रद्द करण्याचे आदेश जळगावच्या माध्यमिक शिक्षणाधिकारी कार्यालयला प्राप्त झाले आहेत.

नाशिक विभागातील नाशिकसह जळगाव, धुळे, नंदुरबार जिल्ह्यात एकुण ८९३ शिक्षक व शिक्षकेतर कर्मचाऱ्यांच्या मान्यता रद्द करण्याची कार्यवाही सुरू आहे. यात एकट्या जळगाव जिल्ह्यातील माध्यमिक विभागातील सुमारे ६५० शिक्षकांच्या मान्यता रद्द करण्यात आल्या आहेत.

तपासादरम्यान अनेक प्रकरणांत भरतीपूर्व जाहिरात, आरक्षण रोस्टर, मुलाखतींचे तपशील आणि निवड समितीचे ठराव उपलब्ध नसल्याचे आढळून आले आहे.

वैयक्तिक मान्यता आणि शालार्थ मान्यता रद्द करण्यासह संबधित कर्मचाऱ्यांचे शासकीय वेतन अनुदान थांबविण्याची कार्यवाही केली जाणार आहे. तसेच शासनाची फसवणूक केल्याप्रकरणी संबंधित संस्थाचालक, तत्कालीन मुख्याध्यापक आणि लाभार्थी कर्मचाऱ्यांविरुद्ध फौजदारी गुन्हे दाखल करण्याचे आदेश देण्यात आले आहेत.

अनियमिततेच्या काळात संबंधित पदांवर कार्यरत अधिकारी व कर्मचाऱ्यांचीही खातेनिहाय चौकशी करून शिस्तभंगाची कारवाई प्रस्तावित आहे. नियमबाह्य पद्धतीने वेतन घेतल्याचे निष्पन्न झाल्यास वसुलीची कारवाई केली जाऊ शकते.