बारामती: बारामती तालुक्यातील बहुचर्चित श्री सोमेश्वर सहकारी साखर कारखान्याच्या पंचवार्षिक निवडणूकीत उपमुख्यमंत्री सुनेत्रा पवार यांच्या नेतृत्वाखालील राष्ट्रवादी काँग्रेसच्या पॅनलने सर्व २१ जागांवर विजय मिळवत आपले वर्चस्व पुन्हा एकदा सिद्ध केले आहे.
विद्यमान अध्यक्ष पुरुषोत्तम जगताप यांनी बंड केले खरे मात्र त्यांचाही सुनेत्रा पवार यांच्या झंझावातात दारुण पराभव झाला. बारामती तालुक्याच्या राजकारणावर अजितदादा यांच्यानंतर देखील आपली पकड कायम असल्याचे या निकालाने सुनेत्रा पवार यांनी सिध्द करत विरोधकांची हवा काढून घेतली.
अगदी शेवटच्या क्षणी विद्यमान अध्यक्ष पुरुषोत्तम जगताप यांनी बंडाचा झेंडा फडकवत राष्ट्रवादी काँग्रेस पक्षाच्या विरुद्ध पॅनल उभे केले होते. त्यानंतर अवघ्या आठ दिवसांच्या काळात सुनेत्रा पवार, पार्थ पवार व जय पवार यांनी राष्ट्रवादी काँग्रेस पक्षाच्या पदाधिकाऱ्यांना एकत्र करत प्रचाराला दिशा दिली.
सोमेश्वर कारखान्याच्या कार्यक्षेत्रातील गावे पिंजून काढत नाराजांची नाराजी दूर करत जे उमेदवार दिलेले आहेत, त्यांच्या पाठीशी पक्षाची सर्व ताकद उभी करत एक हाती विजय खेचून आणला. चुरशीची निवडणूक होईल असे चित्र निर्माण झाले होते, प्रत्यक्षात मात्र सभासदांच्या पाठिंब्यामुळे ती कमालीची एकतर्फी झाली. राष्ट्रवादी काँग्रेसच्या सर्व 21 उमेदवारांनी मोठ्या मताधिक्याने विजय मिळविला.
पुरुषोत्तम जगताप यांच्या मागे पुरंदरचे माजी आमदार संजय जगताप यांच्या माध्यमातून भाजपने देखील ताकद उभी केली होती. युगेंद्र पवार यांनीही पॅनेल उभे करुन आव्हान देण्याचा प्रयत्न केला होता. प्रत्यक्षात या दोघांनाही भोपळाही फोडता आला नाही. सभासदांनी त्यांना नाकारत अजितदादांच्या विचारावर वाटचाल करणा-या संचालकांच्या पारडयात मत टाकले.
दुसरीकडे सुनेत्रा पवार यांना शिवसेनेचे आमदार विजय शिवतरे यांनी पाठिंबा देत मदतीचा हात पुढे केला होता. सलग तेरा वर्षे अध्यक्ष पद भूषविलेले पुरुषोत्तम जगताप काही चमत्कार घडवून दाखवतील, अशी चर्चा कार्यक्षेत्रात होती. प्रत्यक्षात शेवटच्या चार दिवसात सुनेत्रा पवार, जय पवार व पार्थ पवार यांनी कार्यक्षेत्र पिंजून काढत सभासदांना वेगळा विश्वास देऊ केला.
अजित पवार यांच्या निधनानंतर पुरुषोत्तम जगताप यांनी केलेले बंड सभासदांना रुचले नाही, तेरा वर्ष अध्यक्षपद देऊनही त्यांनी पवार कुटुंबियांच्या विरोधात घेतलेली भूमिका सभासदांना पटलीच नाही, त्यामुळे त्यांनी अजित पवार यांच्या कुटुंबीयांच्या पाठीशी उभे राहण्याचा निर्णय घेत या पॅनलला भरघोस मताधिक्याने विजयी केले.
ज्या उमेदवारांच्या नावांना पुरुषोत्तम जगताप यांनी विरोध केला होता ते सर्व उमेदवार मोठया मताधिक्याने विजयी झाले. गेल्या एक तपाहून अधिक काळ असलेली जगताप यांची या कारखान्यावरील सत्ता या पराभवाने संपुष्टात आली.
निंबूत खंडाळा गट क्रमांक एक-
अभिजित सतीश काकडे- 14049
प्रमोद भगवानराव काकडे- 14981
डॉ. वसंतराव रामराव दगडे- 13999
मुरुम वाल्हा गट क्रमांक दोन
विक्रम आनंदराव भोसले- 13584
ऋषिकेश शिवाजीराव गायकवाड- 13941
राजवर्धन शिवाजीराव शिंदे- 14015
होळ मोरगाव गट क्रमांक तीन
रवींद्र जयवंतराव भापकर- 12075
मकरंद चंद्रकांत सस्ते- 14316
मनीषा आनंदकुमार होळकर- 14226
को-हाळे सुपा गट क्रमांक चार
राजेंद्र हरिभाऊ बोरकर- 13896
अक्षय धनंजय खलाटे- 14500
सुनील नारायण भगत- 13746
मांडकी जवळार्जुन गट क्रमांक पाच
सतीश संपत जगताप-14647
सुधाकर ज्ञानोबा टेकवडे- 13819
उत्तम महादेव धुमाळ- 13870
महिला राखीव प्रतिनिधी अ वर्ग
प्रणिता मनोज खोमणे- 14356
छबुबाई अंकुश नाझिरकर- 13583
भटक्या जाती व विमुक्त जमाती
अशोक चंद्रकांत धायगुडे- 14540
इतर मागासवर्गीय
शैलेश पंढरीनाथ रासकर- 14577
अनुसूचित जाती जमाती
द्वारकोजी गुलाब साळवे- 14064
ब वर्ग प्रतिनिधी
संग्राम तानाजी सोरटे -93
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.