Jalgaon DPDC meeting : निधीवाटपावरुन तुफान खडाजंगी, पालकमंत्री गुलाबरावांना महायुतीच्याच आमदारांनी घेरलं

Jalgaon DPDC meeting : जिल्हा नियोजन समितीच्या बैठकीत निधी वाटपात असमानता असल्याचा आरोप करत शिवसेना शिंदे गटाचे आमदार किशोर पाटील व भाजपचे आमदार मंगेश चव्हाण यांनी पालकमंत्री गुलाबराव पाटील यांना घेरलं. सुरुवातीला, जिल्हा नियोजन समितीमधून शेतकऱ्यांसाठी निधी दिला जात नाही. आपल्या मर्जीप्रमाणे परस्पर निधी खर्च केला जातो असा आरोप आमदार किशोर पाटील यांनी केला.

त्यापाठोपाठ आमदार मंगेश चव्हाण यांनी गुलाबराव पाटील यांना घेरलं. बैठकांना आमदारांना बोलाविले जात नाही, परस्पर निधी वाटपाचे निर्णय घेतले जातात असा आरोप आमदार चव्हाण यांनी केला. यावेळी पालकमंत्री गुलाबराव पाटील व आमदारांमध्ये चांगलीच खंडाजगी झाली. मी पाच वर्षांचा हिशोब देऊ शकतो असे सांगत गुलाबरावांनी आमदारांना समजविण्याचा प्रयत्न केला.

हा वाद सुरु असताना मंत्री संजय सावकारे यांनी मध्यस्थी करण्याचा प्रयत्न केला. त्यावेळी दोन्ही मंत्र्यांनी या विषयाला वेगळ्या वळणावर नेऊ नये. तुम्ही दोघांनी या विषयाला वेगळं वळण लावलं असा आरोप आमदार किशोर पाटील यांनी केला. त्यावर मंत्री सावकारेंनी त्यांना समजवण्याचा प्रयत्न केला. तर हे प्रकरण तेथेच थांबवित याबाबत वेगळी बैठक घेण्याचे आश्वासन पालकमंत्री गुलाबराव पाटलांनी यावेळी दिले.

पालकमंत्र्यांनी अधिकाऱ्यांव्यतिरिक्त कुणीही सभागृहात बसले असाल तर त्यांनी बाहेर जावे, अन्यथा गुन्हा दाखल करु अशी तंबी दिली होती. बैठकीत पत्रकारांनाही बसू दिलं नाही. त्यावर मंगेश चव्हाण यांनी प्रश्न उपस्थित केला. त्यावर पालकमंत्र्यांनी पत्रकारांना आत सोडू नका. तो माझा अधिकार आहे, असे सांगत आमदार चव्हाणांना रोखले. चव्हाणांनी ही बाब लोकशाहीसाठी योग्य नाही, असे सांगत 'असे चालणार नाही' असं पालकमंत्र्यांना सूनावलं.

यावेळी वस्त्रोद्योग मंत्री संजय सावकारे, खासदार स्मिता वाघ, जिल्हा परिपदेच्या मुख्य कार्यकारी अधिकारी मीनल करनवाल, पोलिस उपअधीक्षक अशोक नखाते, आमदार किशोर पाटील, मंगेश चव्हाण, राजूमामा भोळे, प्रा. इंद्रकांत सोनवणे, अमोल जावळे, अमोल पाटील व अधिकारी उपस्थित होते.