Jalgaon APMC : उद्धव ठाकरेंचा शिलेदार महायुतीच्या नेत्यांना पुरुन उरला, जळगाव बाजार समितीचं सभापती पद राखलं

Jalgaon APMC : स्थानिक स्वराज्य संस्थांच्या निवडणुकांच्या आधीच जळगावच्या कृषी उत्पन्न बाजार समितीत राजकारण तापलं होतं. गेल्या काही दिवसांपासून सभापतीपदावरुन मोठ्या नाट्यमय घडामोडी घडत होत्या. अखेर शिवसेना उद्धव बाळासाहेब ठाकरे पक्षाने महायुतीला जोरदार धक्का देत सभापती पद खेचून आणलं आहे.

उद्धव ठाकरे गटाचे सुनील महाजन सभापतिपदी विजयी झाले. तर उपसभापतिपदी महायुतीचे एकमेव गोकुळ चव्हाण यांचाच अर्ज दाखल झाल्याने त्यांची बिनविरोध निवड झाली. दरम्यान, निवडीच्या सभेला मावळते सभापती श्यामकांत सानवणे गैरहजर राहिल्याने राजकीय वर्तुळात तो चर्चेचा विषय ठरला.

जळगाव बाजार समितीत राष्ट्रवादी अजित पवार यांचा गट व भाजप मिळून महायुतीचा सभापती करण्यासाठी रणनिती आखत होते. सभापती पदासाठी ठरल्याप्रमाणे एका वर्षासाठी मुदत असताना दोन वर्षे उलटूनही राजीनामा न दिल्याने बाजार समितीचे सभापती श्यामकांत सोनवणे यांच्यावर १४ संचालकांनी अविश्वास आणला होता. हे सर्व संचालक सहलीवर रवाना झाले होते. मात्र अविश्वासाला सामोरे जाण्याआधी सोनवणे यांनी राजीनामा देऊन टाकला.

सोनवणे यांनी राजीनामा दिल्यानंतर रिक्त जागेवर निवडप्रक्रियेसाठी विशेष सभेचे आयोजन करण्यात आलं होतं. यावेळी निवड प्रक्रियेत सभापतिपदासाठी सुनील महाजन, मनोज दयाराम चौधरी व लक्ष्मण गंगाराम पाटील (लकी टेलर) यांनी अर्ज दाखल केले. यात सभापतिपदासाठी मनोज चौधरी यांनी आपला अर्ज मागे घेतल्याने सभापती पदासाठी सुनील महाजन विरुद्ध लक्ष्मण पाटील असा सामना झाला. त्यात हात उंचावून मतदान घेण्यात आले. यामध्ये महाजन यांच्यासाठी तब्बल १५ जणांनी हात वर करत मतदान केले. तर लक्ष्मण पाटील यांना अवघी दोन मते मिळाली. त्यामुळे सभापती पदाची माळ सुनिल महाजन यांच्या गळ्यात पडली. तर उपसभापतीपदासाठी गोकुळ चव्हाण यांनी एकमेव अर्ज दाखल केला होता त्यामुळे त्यांची बिनविरोध निवड झाली.

शेतकरी केंद्रबिंदू म्हणून काम करु, शेतकऱ्यांच्या पानंद रस्त्यांचे प्रश्न सोडवू असे आश्वासन नवनिर्वाचित सभापती सुनिल महाजन यांनी दिले. सुरेशदादा जैन यांच्या कट्टर कार्यकर्त्याला सभापतिपदाची संधी मिळाल्याचं ते म्हणाले. संचालकांनी विश्वास टाकल्याने व दोन्ही मंत्री, आमदार चंद्रकांत सोनवणे यांच्या आशिर्वादाने सभापती झालो असे महाजन म्हणाले.