Jalgaon MLC Election : एकनाथ शिंदेंचा एक फोन अन् रात्रीत गेम फिरला, गिरीश महाजनांच्या शिलेदाराचा विजयाचा मार्ग मोकळा..

Jalgaon MLC Election : उपमुख्यमंत्री एकनाथ शिंदे यांच्या एका फोनमुळे जळगाव विधान परिषद निवडणुकीत एका रात्रीत गेम फिरला आहे. अपक्ष उमेदवार अनिल चौधरी यांनी आपली निवडणुकीतून अचानक माघार घेण्याचा निर्णय घेतल्याने मंत्री गिरीश महाजन यांचे जवळचे शिलेदार व महायुतीचे अधिकृत उमेदवार नंदकिशोर महाजन यांच्या विजयाचा मार्ग त्यामुळे मोकळा झाला आहे.

उपमुख्यमंत्री एकनाथ शिंदे व बच्चू कडू यांनी आपल्याशी फोनवर संपर्क केल्याचे अनिल चौधरी यांनी सांगितले. त्यांचा मान ठेवून मी निवडणुकीत थांबत आहे असे त्यांनी सांगितले. काल मतदानसाठी अवघे काही तास बाकी असताना अनिल चौधरी यांनी पत्रकारपरिषद घेत आपण निवडणुकीतून माघार घेत असल्याची घोषणा केली. दरम्यान अनिल चौधरी हे लवकरच एकनाथ शिंदे यांच्या नेतृत्वातील शिवसेना शिंदे गटात प्रवेश करणार असल्याचेही बोलले जात आहे.

दरम्यान मी देखील मंत्री गिरीश महाजन यांचा निकटवर्तीय होतो. महाजन हे माझे मोठे बंधू आहेत. परंतु त्यांनी आशीर्वाद दिला नाही, त्यांनी मला आशीर्वाद दिला असता तर कदाचित मी आज आमदार राहिलो असतो, अशी खंत अनिल चौधरी यांनी यावेळी बोलून दाखवली. नंदकिशोर महाजन यांच्या मैत्री खातर आपण निवडणुकीतून माघार घेत असल्याचे त्यांनी सांगितले.

दरम्यान, जळगाव विधान परिषद निवडणुकीत यापूर्वी शिवेसेनेच्या नगरसेविका रेश्मा कूंदन काळे यांनी देखील एकनाथ शिंदे यांच्या आदेशावरुन माघार घेतली होती. आता अनिल चौधरी यांना देखील एकनाथ शिंदे यांनी विनंती केल्याने त्यांनीही माघार घेतली. त्यामुळे भाजपचे महायुतीचे अधिकृत उमेदवार नंदकिशोर महाजन यांचा मार्ग अधिक सोपा झाला आहे. त्यांचा विजय आता निश्चित मानला जात आहे.

आता रिंगणात दोनच उमेदवार

आज मतदानाचा दिवस आहे. अंतिम चार उमेदवार रिंगणात होते. चारपैकी शिवेसेनेच्या नगरसेविका रेश्मा काळे व प्रहारचे अनिल चौधरी या दोघांनी माघार घेत महायुतीला समथर्न दिले याहे. त्यामुळे भाजप-महायुतीचे उमेदवार नंदकिशोर महाजन व शिवसेना उबाठाचे उमेदवार शरद तायडे दोघेच रिंगणात राहिले आहेत.