Jalgaon Police : जळगाव पोलिस दलात खळबळ, हजेरी मास्तरांशी गैरवर्तन केल्याचा ठपका ठेवत दोन महिला सहायक फौजदार निलंबित

Jalgaon News : जळगावच्या जिल्हा पोलिस मुख्यालयात कार्यरत असलेल्या दोन महिला सहायक फौजदारांनी हजेरी मास्तरांशी गैरवर्तन करत वाद घातल्याची घटना समोर आली आहे.

पोलिस दलातील शिस्तभंगाचे हे प्रकरण गंभीर मानत जिल्हा पोलिस अधीक्षक श्रीकांत धिवरे यांनी दोन्ही महिला कर्मचाऱ्यांना तात्काळ निलंबित करण्याचे आदेश दिले. गीता हरिशंकर कश्यप आणि श्रद्धा वसंतराव रामोशी अशी निलंबित सहायक फौजदारांची नावे आहेत.

या संदर्भात पोलिस मुख्यालयाचे राखीव पोलिस निरीक्षक प्रशांत सुगरवार यांनी दोन्ही महिला कर्मचाऱ्यांविरोधात स्वतंत्र कसुरी अहवाल तयार करून तो पोलिस अधीक्षकांकडे सादर केला होता.

त्यानुसार, १६ जुलै रोजी दुपारी दीड वाजेच्या सुमारास गीता कश्यप यांनी हजेरी मास्तर संभाजी पाटील यांच्याशी शाब्दिक वाद घातला. पोलिस अधीक्षकांना पाठविलेल्या अहवालावरून माझे इन्क्रिमेंट (वेतनवाढ) थांबविल्याचे सांगत अशोभनीय वर्तन करीत मुख्यालयात गोंधळ घातला होता.

या घटनेनंतर अवघ्या दुसऱ्याच दिवशी, १७ जुलै रोजी सकाळी सुमारे ११ वाजता दुसऱ्या सहायक फौजदार श्रद्धा वसंतराव रामोशी यांनी सकाळी अकराच्या सुमारास मुख्यालयात हजेरी मास्तर संभाजी पाटील यांना गाठून पोलिस अधीक्षकांना अहवाल पाठविल्यावरून वाद घातला व गैरव्यवहाराचे आरोप केले व गोंधळ घातला.

या दोन्ही प्रकरणांचा पोलिस निरीक्षक प्रशांत सुगरवार यांनी जिल्‍हा पोलिस अधीक्षकांना अहवाल सादर केला. पोलिस अधीक्षकांनी या गंभीर प्रकरणाची दखल घेत दोघा महिला कर्मचाऱ्यांना तत्काळ प्रभावाने निलंबित करण्याचे आदेश दिले आहेत.

यापूर्वी घातला होता गोंधळ (Jalgaon News)

दोन्ही महिला सहायक फौजदारांच्या निलंबनाचे आदेश मुख्यालयात पोहोचताच या कारवाईची जोरदार चर्चा सुरू झाली. निलंबित महिला सहायक फौजदारांपैकी एकीने यापूर्वीही भुसावळ येथे कर्तव्यावर असताना गोंधळ घातला होता. तत्कालीन पोलिस निरीक्षकांवर हात उगारून मानहानीकारक वर्तन केल्यानेच या महिला कर्मचाऱ्यांची मुख्यालयी बदली झाली होती, अशी माहिती सूत्रांनी दिली.